Трамп: “Путин мени алдади”

АҚШ президенти Доналд Трамп ABC News телеканалига берган интервьюсида Владимир Путиннинг Россия-Украина урушини тўхтатишни хоҳлашига ишонишини билдирди.

Интервью давомида журналист Трампнинг илгари айтган фикрини эслатди — у Путин томонидан Украинага қарши амалга оширилган сўнгги ракета ҳужумлари “асабийлаштирувчи ва сабабсиз” эканини таъкидлаган эди. 

Шунингдек, Трамп ўшанда Путин “урушни тўхтатишни истамаётгандир, балки мени шунчаки алдаётгандир”, деган эди. Шу боис, журналист АҚШ президентидан: “Путин сизни алдадими?” дея очиқ сўради.

Бунга жавобан Трамп, “Ҳа, эҳтимол, у мени бироз алдаётгандир. Шундай бўлса ҳам, менимча, у урушни тўхтатишни хоҳлайди”, деган. 

Шунингдек, Оқ уй раҳбари Путиннинг асл мақсади Украина ҳудудининг барчасини эгаллаш бўлганини таъкидлади.

Бундан ташқари, Трамп Россия Украинага кенг кўламли бостириб киришига айнан АҚШ президенти Жо Байденнинг заиф сиёсати сабаб бўлганини айтган.

Маълумот учун, кеча тунда Харьков шаҳри дронлар ҳужумига учради. Фавқулодда вазиятлар хизмати хабарига кўра, шаҳарнинг бир нечта ҳудудларига зарбалар йўналтирилган. Оқибатда, шаҳарда 10 та ёнғин юзага келган.

Дронларнинг бири тиббиёт муассасаси яқинида қулаган бўлса, яна бири кўп қаватли турар жой биносига тушган. 

Харьков вилояти ҳарбий маъмурияти раҳбарининг бугун тонгида берган расмий баёнотига кўра, ҳужум оқибатида жами 45 киши жабрланган.