Швециядаги масжид яқинида отишма: икки киши жароҳат олган

Швециянинг Эребру шаҳрида масжид олдида содир бўлган отишма оқибатида икки киши яраланган.

Al-Arabiya хабарига кўра, масжиддан чиққан намозхонларга қарата ўқ узилган.

Полиция ҳозирча ҳодиса ҳақида тўлиқ маълумот бермаяпти.

"Биз ҳозир жиноятчиларни излаяпмиз", деган полиция матбуот котиби Андерс Далман. Унинг сўзларига кўра, айни дамда гувоҳлар сўроқ қилиниб, тергов ишлари олиб борилмоқда.

Ҳодиса юзасидан жиноят иши қўзғатилгани айтилмоқда.

Жорий йил февраль ойида Эребру мактабидаги оммавий қотиллик сабаб 11 киши ҳалок бўлганди.