Марокашда коррупцияга қарши норозилик намойиши бошланди

Марокаш пойтахти Работда мамлакатда кенг томир ёйган коррупцияга қарши норозилик намойишлари бўлиб ўтди.

Reuters агентлигининг хабар беришича, ёшлар учинчи кундирки тиббиёт ва таълим соҳасидаги коррупция билан боғлиқ муаммоларни ҳал этиш талаби билан кўчаларга чиқишмоқда. Акциялар асосан Работ, Касабланка, Агадир, Танжер ва Ужда шаҳарларида бўлиб ўтмоқда.

Норозиликлар “GenZ 212” деб номланган аноним гуруҳ томонидан TikTok, Instagram ва Discord ижтимоий тармоқлари орқали ташкил этилгани айтилмоқда.

Айни дамда полиция коррупцияга қарши шиорларни баланд овозда айтаётган ёки журналистларга бу ҳақда интервью берган ёшларни қўлга олган. Турли шаҳарларда ўнлаб одамлар ҳибсга олинаётгани айтилмоқда. Улар орасида болаларни ҳимоя қилиш ассоциацияси раҳбари Наджат Ануар ҳам бор. Унинг айтишича, у вояга етмаганлар қўлга олингани ҳақидаги хабарларни текшириш учун келган, аммо ўзи ҳам ҳибсга олинган.

Намойишларга асосий сабаб сифатида шифохоналардаги ёмон шароит, шифокорлар етишмаслиги, ускуналар танқислиги ва тиббий хизмат сифатининг пастлиги кўрсатилмоқда. Шунингдек, ёшлар таълим соҳасидаги ҳолатдан ҳам норози ва ҳукуматдан юзага келган аҳвол учун жавобгарликни талаб қилмоқда.