13.02.2025 17:15
Исроил Эрон ядровий инфратузилмасига ҳужум уюштириши кутилмоқда – АҚШ разведкаси
The Washington Post нашри ўз манбаларига таяниб, Исроил яқин ойларда Эроннинг ядровий иншоотларига зарба беришни режалаштираётгани ҳақида хабар берди.
АҚШ разведкасига кўра, эҳтимолий ҳужум Эроннинг ядровий дастурини бир неча ҳафтадан олти ойгача орқага суриши мумкин, аммо Яқин Шарқдаги кескинликни янада кучайтириши аниқ.
Нашр манбаларига кўра, Исроил 2025 йилнинг биринчи ярмида Фордо ва Натанз ядровий объектларига ҳужум қилишга тайёргарлик кўрмоқда. Ҳарбий раҳбарият ўтган йил октябрь ойида Эрон ҳаво мудофаасига қарши амалга оширилган операциядан тўпланган тажрибадан фойдаланишни режалаштирмоқда.
Манбаларга кўра, Исроилда икки хил ҳужум варианти, ҳаводан учириладиган баллистик ракеталар билан зарба бериш ва ядровий объектларни БЛУ-109 бункер йўқ қилувчи бомбалар билан бомбалашни кўриб чиқмоқда.
Бу операцияда Америка Қўшма Штатларининг иштироки муҳим рол ўйнаши мумкин. Хусусан, Исроил самолётларига ҳавода ёқилғи қуйиш, разведка ва нишонни белгилашда АҚШнинг ёрдами талаб этилиши мумкин.
Оммавий ахборот воситалари декабрь ойида Исроил Суриядаги мавжуд вазиятдан келиб чиқиб, Эронга зарба беришга ҳозирлик кўраётгани ҳақида хабар тарқатган эди.
Эрон ҳозирча бу даъволарга расмий жавоб бермаган, аммо аввалроқ Исроилнинг эҳтимолий ҳужумига қарши қатъий жавоб қайтаришини бир неча бор таъкидлаган.
