Доғистон муфтияти эридан кўп нарса талаб қилаётган аёлларни танқид қилди

Доғистон муфтияти айрим аёлларнинг ижтимоий тармоқ таъсирига тушиб қолганини танқид қилди. Махачқалъа имомлари кенгаши раиси Дониёл Умаиловнинг айтишича, жамиятда шаклланаётган "замонавий одатлар" оилавий қадриятларга салбий таъсир қилмоқда.

Унинг сўзларига кўра, аёл озгина пул топса, атрофидагилар таъсирида ўзининг киракашлик ёки қора меҳнат қилиб ҳалол пул топаётган турмуш ўртоғига беписандлик кўрсатмоқда.

"Эри ҳалол меҳнат қилиб, оиласини таъминлаб турибди. Хотини эса уни омадсиз деб ҳисоблайди", деган имом.

Умаилов баъзи доғистонлик аёллар ижтимоий тармоқлар таъсирида жуфти ҳалоли меҳнаткаш бўлишига қарамай, ундан ажралишга баҳона излаётганини қўшимча қилган.

Муфтият вакилининг фикрича, бундай муаммолар интернет ва ижтимоий тармоқларда тарқалаётган "аёл мустақил ва эркин бўлиши керак" деган ғоялар сабаб келиб чиқмоқда. Бу эса асл қадриятлар ва оилаларнинг мустаҳкамлигига путур етказяпти.