БМТ Афғонистонда интернет ўчирилишини қоралади

Бирлашган миллатлар ташкилоти ўз баёнотида "афғон ҳукуматининг бутун мамлакат бўйлаб интернетни ўчириш қарори минтақадаги гуманитар вазиятга салбий таъсир қилгани"ни маълум қилди.

Ташкилотга кўра, мамлакатнинг жаҳон ахборот тармоғидан узилиши яқинда рўй берган кучли зилзиладан жабрланган ва тахминан икки минг киши ҳалок бўлган чекка ҳудуд аҳолисига гуманитар ёрдам кўрсатишни қийинлаштирмоқда.

Шунингдек, БМТ гуманитар ташкилотлар ходимлари билан алоқани йўқотганини билдирган. Соғлиқни сақлаш дастурлари, жумладан эмлаш жараёни, банк ва молиявий хизматлар кўрсатилиши ҳам издан чиқди, дейилади баёнотда. Оддий аҳоли эса пул ўтказмаларини амалга оширолмаяпти.

Ташкилотнинг қўшимча қилганидек, Кобулнинг ҳаракатлари авиақатновлар бекор қилинишига ҳам олиб келган.