11.08.2025 07:00
165
Асл қиёфаси фош бўлаётган исроил "Ал-Жазира"нинг беш ходимини ўлдирди
Кеча, 10 август куни кечқурун босқинчи исроил Ғазодаги “аш-Шифо” касалхонаси яқинида жойлашган "Ал-Жазира" ходимларининг чодирига ҳужум қилди. Оқибатда телеканалнинг 28 ёшли таниқли мухбири Анас аш-Шариф ва унинг тўрт ҳамкасби ҳалок бўлди.
Шаҳид этилганлар қаторида телеканал мухбири Муҳаммад Қрийқаҳ, операторлар – Иброҳим Зоҳир, Мухаммад Навфал ва Мўмин Алива ҳам бор эди.
Ғазодан кенг қамровли репортажлари билан танилган Анас ўлдирилишидан бироз олдин “X” ижтимоий тармоғида сионистлар Ғазонинг шарқий ва жанубий қисмларини қаттиқ бомбалаётгани ҳақида ёзганди.
“Тўхтовсиз бомбардимон… Охирги икки соат мобайнида исроилнинг Ғазо шаҳрига тажовузи кучайди”, деганди у ўз хабарида.
Сионистлар бу ҳақдаги баёнотида оддий мухбирни гўёки ҲАМАСнинг “ҳужумларни йўналтирувчи бўлими раҳбари” дея иддао қилди.
Бироқ Euro-Med Human Rights Monitor таҳлилчиси Муҳаммад Шаҳада бу каби даъволар мутлақо асоссиз эканини маълум қилди. Олдинроқ, сионистлар томонидан молиялаштириладиган ОАВлар исроилнинг Ғазодаги ваҳшийликларини ҳаспўшлаб, асл ҳолат акс эттирилган хабарларни "фейк" дея жар сола бошлаганди. Фаластинликлар қирғинини жамоатчиликдан беркитолмаётган исроил журналистларни ўлдиришга зўр бермоқда.
Маълумот учун, Ғазодаги қирғин бошланганидан бери босқинчи исроил армияси 200 дан ортиқ журналист ва медиа ходимларини ўлдирган.
