30.12.2024 18:04
Афғонистонда деразаларни қўшни уйдаги аёллар кўринадиган қилиб ўрнатиш тақиқланди
Афғонистонда уйларнинг деразаларини қўшнининг уйидаги аёллар кўринадигпн қилиб қуриш тақиқланди. Бу ҳақдаги фармонни “Толибон” етакчиси Ҳайбатуллоҳ Охундзода имзолаган.
Tolo News нашрининг хабар қилишича, афғон фуқароси уйининг деразалари ошхона, болалар боғчаси ва қўшнисининг уйидаги аёллар бўлиши мумкин бўлган бошқа хоналар деразалари кўринмайдиган тарзда ўрнатилиши керак.
Агарда уй аллақачон шундай кўринишда қурилган бўлса, уй олдига девор ўрнатиш ёки бошқа йўл билан "қўшнига зарар етказилишининг олдини олиш" бўйича кўрсатмалар мавжуд.
Эслатиб ўтамиз, октябрь ойи охирида Афғонистонда аёлларга нафақат эркаклар, балки аёллар билан ҳам омма олдида гаплашиш тақиқланган эди. Шунингдек, аёллар бошқа аёллар ҳузурида ҳам Қуръонни баланд овозда ўқишдан ўзларини тийишлари керак.
