Россия президенти Владимир Путин таклифига кўра, бир неча давлат раҳбарлари ва расмий шахслар Москвага Иккинчи жаҳон урушидаги Ғалабанинг 80 йиллигини нишонлаш учун борадиган бўлди. Озарбайжон ва Лаос президентлари Илҳом Алиев ва Тҳонглоун Сисоулит парадда қатнашмаслигини билдирган. Шу тариқа, Ғалаба парадида аввал хабар қилинганидек 29 эмас, 27 та давлат раҳбари меҳмон бўлиши кутилмоқда.

Президент Шавкат Мирзиёев Россия президенти Владимир Путиннинг таклифига биноан 8-9 май кунлари амалий ташриф билан Москва шаҳрида бўлади. Ташриф дастурига мувофиқ, Мирзиёев Иккинчи жаҳон урушидаги Ғалабанинг 80 йиллигига бағишлаб ўтказиладиган тантанали тадбирларда иштирок этади. Парадда Хитой раиси Си Цзиньпин ҳам иштирок этиши кутилмоқда.