Зеленский: Украинага бегона ҳудудлар эмас, чегарада тинчлик ва осойишталик керак

Украинага бегона ҳудудлар эмас, 6992 километрлик чегарада тинчлик ва осойишталик керак. Бу ҳақда Украина президенти Владимир Зеленский Мустақиллик куни муносабати билан ўз видеомурожаатида маълум қилди.

Зеленский Россия билан чегарадан бир неча километр узоқликда жойлашган Псел дарёси яқинидаги Суми вилоятидан видеомурожаатни ёзиб олди.

“Бугун биз Украина Мустақиллигининг 33 йиллигини нишонлаяпмиз. Душман юртимизга олиб келган нарса эса энди ўз уйига қайтди. Ким бизнинг ерларимизни буфер зонага айлантирмоқчи бўлса, мамлакат буфер федерацияга айланиб қолмаслиги ҳақида ўйлаши керак”, — деди президент.

Унинг таъкидлашича, "Россиянинг давлат ва халқ ҳаётига таҳдид манбаи бўлган ҳар бир нуқтасига эртами-кечми Украинадан жавоб келади".

“Юртларимизга тинчлик ва осойишталик керак. Бутун чегарамиз узунлиги 6992 километр. Қуруқликда ҳам, денгизда ҳам, ҳавода ҳам, мамлакат ичида ҳам – ҳамма жойда қадриятларимизни асраб-авайлаймиз”, — деди Зеленский.

Унинг сўзларига кўра, "украиналиклар ҳар доим қарзларини қайтаришади".

“Юртимизга фалокат тилаган киши эса уни уйида қабул қилиб олади. Фоизлари билан. Юртимизга ёмонлик сочмоқчи бўлганлар унинг мевасини ўз ҳудудида териб олади. Бу башорат эмас, мақтаниш эмас, кўр-кўрона қасос олиш эмас, бу намунадир. Адолат. Ёвузлик учун бумеранг”, — дея қўшимча қилди Украина президенти.

У, шунингдек, Россия украиналикларга ўзининг "қизил чизиқлари"ни буюрмаслигини, чунки Украина ўз йўлини танлашини таъкидлади.

Украина 24 август куни ўзининг Мустақиллик кунини нишонлайди.

Мавзуга алоқадор

Энг кўп ўқилган

Тавсия қилинган