Жанубий Корея парламенти президент импичменти учун етарли овоз тўплай олмади

Қоидага кўра, импичмент эълон қилиниши учун 300 депутатдан 200 нафари қўллаб-қувватлаб овоз бериши керак эди. Бироқ ҳукмрон «Халқ кучи» партиясининг 108 депутатидан 105 нафари овоз беришдан бош тортиб, мажлислар залидан чиқиб кетди. 

Мухолифат президентни жавобгарликка тортиш ҳаракатлари тўхтамаслигини билдирди.

Мажлис давомида парламент олдида президентга импичмент эълон қилиш ва уни ҳибсга олишни талаб қилган бир неча минг намойишчи тўпланди. BBC рус хизматининг ёзишича, оломон мажлисни тарк этаётган ҳукмрон партия депутатларини ғазабнок қичқириқлар билан кузатиб қўйган.

7 декабрь куни Юн Сок Ёль телевидение орқали халққа мурожаат қилиб, ҳарбий ҳолат жорий этиш қарори учун мамлакат аҳолисидан узр сўраган эди. 

3 декабрь куни кечқурун президент Юн Сок Ёль Жанубий Кореяда 45 йил ичида биринчи марта "конституциявий тартибни «коммунистик кучлар»дан ҳимоя қилиш" мақсадида ҳарбий ҳолат эълон қилганди. 

Парламент депутатлари президент қарорига қарши чиқиб, уни бекор қилиш учун овоз берди, шундан сўнг президент ҳарбий ҳолатни бекор қилди. 

4 декабрь куни мухолифатдаги партиялар парламентга Юн Сок Ёль импичменти бўйича таклиф киритди. Президент импичменти учун парламент депутатларининг 2/3 қисми (жами 300 ўрин) овоз бериши керак.

Шунингдек, Жанубий Корея полицияси Юн Сок Ёлни давлатга хиёнатда гумон қилиб, тергов бошлагани маълум бўлди.