Трамп Эронга ядро битими учун икки ой муддат берди

Axios’нинг хабар беришича, Доналд Трамп Эрон олий раҳнамоси Оятуллоҳ Али Хоманаийга кескин оҳангда мактуб йўллаб, янги ядро битими тузиш учун икки ой муҳлат белгилади. Мактубда, агар Эрон музокаралардан бош тортса, оғир оқибатларга дуч келиши мумкинлиги айтилган.  

Трамп “умрбод давом этадиган музокараларни” истамаслигини билдирган. Нашр хабарига кўра, агар Эрон АҚШ шартларини рад этса, Вашингтон ёки Исроил Эроннинг ядро объектларига ҳарбий зарба бериши мумкин.  

Трамп аввалроқ “Fox News”га берган интервьюсида илк бор Хоманаийга мактуб юборганини айтган. Кейинчалик, у Эрон билан муносабатлар “охирги чегарага етганини” ва мамлакатнинг ядро қуролига эга бўлишига йўл қўйиб бўлмаслигини таъкидлаган.  

Эрон етакчиси Али Хоманаий эса Трампнинг музокаралар таклифини “алдов” деб атаб, АҚШ Эронни музокаралардан бош тортаётгандай кўрсатишга уринаётганини айтган.  

MAGATE маълумотларига кўра, Эрон ҳозирда 60 фоизгача бойитилган уран захирасига эга бўлиб, бу 90 фоизга етказилганда ядро қуролини яратишга етарли бўлиши мумкин. Теҳрон эса бундай режалари борлигини қатъиян рад этмоқда.