28.01.2025 15:45
Сурия Баняс нефть заводини қайта қуришни бошлади
Сурия ҳукумати мамлакатдаги энг йирик нефтьни қайта ишлаш заводларидан бири бўлган Баняс заводини қайта қуриш ишларини бошлади. Завод фаолияти асосий нефть етказиб берувчи бўлган Эрондан нефть келтириш узилгандан сўнг тўхтаган эди.
Баняс заводи директори Иброҳим Муслимнинг Bloomberg Ал-Шарқ нашрига маълум қилишича, қайта қуриш ишлари нефть қайта ишлаш қувватини оширишга қаратилган.
Таъмирлаш натижасида заводнинг кунлик ишлаб чиқариш қуввати 90 минг баррелдан 110 минг баррелга етказилиши режалаштирилмоқда.
Баняс заводи Сурияда нефть қайта ишлаш бўйича икки асосий объектдан бири ҳисобланади ва мамлакатдаги ички талабни қондиришда катта аҳамиятга эга.
Иккинчи йирик завод эса Ҳомс шаҳрида жойлашган бўлиб, у кунига 100 минг баррелга яқин нефть қайта ишлаш қувватига эга.
Таъмирлаш ишлари орқали Сурия нефть саноатидаги ички эҳтиёжларни қондириш ва иқтисодий қийинчиликларни енгиб ўтишни мақсад қилган.
