27.05.2025 13:02
145
Саудияда 73 йиллик тартиб – спиртли ичимликлар тақиқи бекор қилинадими?
Олдинроқ, қатор Ғарб нашрларида Саудия Арабистони 2026 йилдан бошлаб мамлакатда 73 йилдан бери амал қилаётган алкогол тақиқларини қисман бекор қилишга қарор қилгани ҳақида хабарлар пайдо бўлганди. Маҳаллий нашрлар эса ушбу қарор фақат чет эллик сайёҳлар учун мўлжалланган танланган ҳудудларга тааллуқли экани ҳақида ёзишди.
Алькогол фақат 600 га яқин махсус рухсат этилган жойларда — беш юлдузли меҳмонхоналар, юқори даражадаги курортлар, дипломатик зоналар ва туризм марказларида, хусусан, Неом лойиҳаси ва Синдала оролида сотилиши мумкинлиги қўшимча қилинганди.
Аммо кутилмаганда Саудия Арабистони ҳукумати спиртли ичимликларга қўйилган тақиқ олиб ташланиши ҳақидаги хабарларни қатъий рад этди.
Ҳукуматнинг раддия беришига ушбу хабар жиддий мунозараларни келтириб чиқаргани ҳамда мусулмонларнинг жиддий эътирозлари сабаб бўлган бўлиши мумкин.
Маълумот учун, Саудия Арабистонида алкогол 1952 йилдан бери қатъиян тақиқланган эди. Бу қонун нафақат фуқаролар, балки хорижликлар учун ҳам бирдек амал қилган, уни бузганлар эса қамоқ ва депортацияга дуч келган.
Фақат ўтган йили пойтахт Ар-Риёдда илк бор дипломатларга мўлжалланган спиртли ичимликлар дўкони очилган эди.
