Москва Ереванни Ғарбнинг алдовига учмасликка чақирди

Москва Ереванни Ғарбнинг алдовларига учмасликка ва Арманистонни нотўғри йўлдан юрғизишига йўл қўймасликка чақирмоқда. Бу ҳақда Россия ТИВнинг 5 апрель куни бўлиб ўтган Арманистон-АҚШ-Европа Иттифоқи форматидаги олий даражадаги учрашувига оид баёнотида айтилади, дея хабар берди Anadolu.

Москва 5 апрель куни Брюсселда АҚШ-Европа Иттифоқи-Арманистон форматидаги учрашувни “коллектив Ғарб”нинг Жанубий Кавказни геосиёсий қарама-қаршиликка тортишга қаратилган навбатдаги уриниши сифатида баҳоламоқда.

Ҳужжатда қайд этилишича, минтақадан ташқаридаги кучларнинг Жанубий Кавказ ишларига масъулиятсиз ва бузғунчи аралашуви, минтақа давлатлари ва уларнинг қўшнилари ўртасида ихтилоф чиқариш истаги барқарорлик, хавфсизлик ва иқтисодий тараққиёт учун энг салбий оқибатларга, минтақада янги бўлиниш чизиқлари пайдо бўлишига, шунингдек, назоратсиз ўсиш кескинлигига сабаб бўлади.

“Ғарб Арманистонни Жанубий Кавказда ўзининг ўта хавфли режаларини амалга ошириш воситасига айлантирмоқчи эканлиги кўриниб турибди. Биз биламизки, Вашингтон ва Брюссел вақтинчалик ваъдалар остида Арманистоннинг КХШТ ва ЕОИИ таркибидан чиқишини, Россия ҳарбий базаси ва чегара қўшинларини олиб чиқиб кетишини талаб қилмоқда", дейилади баёнотда.

Москва Арманистон раҳбариятини Ғарбнинг ўзини алдашига ва мамлакатни хавфсизлик бўшлиғининг пайдо бўлиши, иқтисодиётда жиддий муаммолар ва аҳолининг чиқиб кетишига олиб келувчи нотўғри йўлдан юрғизишига йўл қўймасликка чақирди.

“Ғарб, шунингдек, Арманистон-Озарбайжон ўртасидаги нормаллашувнинг фундаментал асоси – Россия, Арманистон ва Озарбайжон раҳбарларининг транспорт ва иқтисодий алоқаларни қайтадан йўлга қўйиш, чегараларни делимитация қилиш, тинчлик келишувларини тайёрлаш, жамоат фаоллари ва мутахассислар  алоқалари орқали ишончни мустаҳкамлашни кўзда тутувчи 2020-2022 йилларга мўлжалланган уч томонлама баёнотлари тўпламини барбод этишга бўлган уринишларидан ҳам воз кечмаяпти. Айнан Вашингтон ва Брюссел босими остида расмий Ереван ушбу келишувларнинг бажарилишини тўхтатиб қўйди, уларнинг кўплари бўйича, хусусан, ўзаро транспорт чекловларини олиб ташлаш масаласида томонлар ўзаро мақбул ечимларга яқин эди. Москва Озарбайжон ва Арманистон ўртасида узоқ кутилган тинчликка эришиш учун ҳар томонлама ҳисса қўшишга тайёр”, - дея таъкидлади Россия ТИВ.

Москванинг фикрича, Жанубий Кавказдаги ҳам минтақавий, ҳам икки томонлама тусдаги муаммоли масалалар 23 октябрь куни Теҳронда бўлиб ўтган ва Арманистон ҳам иштирок этган «3+3» Маслаҳат платформасининг иккинчи йиғилишида келишилган “минтақавий масъулият” тамойилига мувофиқ ҳал этилиши керак.

“Биз ташқи ўйинчиларни ушбу келишувларни ҳурмат қилишга, Ереван ҳукуматини эса ўз ташқи сиёсат йўналишини қуришда қўшни давлатларнинг хавотирларини инобатга олишга чақирамиз”, — дейилади ҳужжатда.

Эслатиб ўтамиз, охирги вақтларда Арманистон-Озарбайжон чегарасидаги ҳарбий вазият таранглашган. Арманистон чегара периметрлари бўйлаб ҳарбий қўшин ва техникаларини жойлаштириб, 24 соат ичида Озарбайжон Қуролли кучлари позицияларига 30 марта турли калибрли қуроллардан ўқ узди.