Миср Ғазо аҳолисини кўчириш ҳақидаги хабарларни рад этди

Миср ҳукумати Ғазо секторидан 500 000 нафар фаластинликни Шимолий Синайга жойлаштириш ҳақидаги хабарларни қатъий рад этди. Мамлакатнинг давлат ахборот хизмати бу ҳақда расмий баёнот бериб, бундай режа йўқлигини тасдиқлади.

Баёнотда таъкидланишича, Қоҳира Ғазо аҳолисини мажбуран кўчиришга йўл қўймайди ва буни фаластинликлар учун қабул қилиб бўлмас ҳолат деб баҳолайди. Шунингдек, Миср бу ҳаракатни миллий хавфсизликка таҳдид сифатида кўради.

“Бир қатор оммавий ахборот воситаларида Миср гўёки Ғазо секторининг 500 000 нафар аҳолисини Синай шимолига жойлаштиришга тайёр экани ҳақида хабар тарқалди. Биз бу маълумотни қатъиян рад этамиз”, дейилади Миср давлат ахборот хизмати баёнотида.

Аввалроқ, Ливаннинг Al-Akhbar газетаси Миср президенти Абдулфаттоҳ ас-Сисининг араб давлатлари етакчиларига Ғазо аҳолисининг маълим бир қисми вақтинчалик Шимолий Синайга кўчирилиши ва у ерда тиклаш ишлари олиб борилиши мумкинлиги ҳақида гапиргани ҳақида хабар тарқатган эди. Бироқ Қоҳира бу иддаоларни “асоссиз”, дея урғулади. 

Маълумот ўрнида, Миср 2023 йил октябрда Ғазода уруш бошланганидан бери фаластинликларни ўз юртидан чиқаришга қаратилган ҳар қандай ҳаракатларга кескин қаршилик билдириб келади.