Мьянмада юз берган зилзила оқибатида мингдан ортиқ киши ҳалок бўлди
Мьянманинг Мандалай шаҳри яқинида содир бўлган 7,7 магнитудали зилзила оқибатида 1000 дан ортиқ киши ҳалок бўлди, 2376 киши жароҳатланди. Бу ҳақда AFP ахборот агентлиги хабар қилди.
Ҳукумат ҳозирда халқаро ёрдам ва хайрияларни қабул қилишга тайёрлигини билдирган.
Шундан сўнг, Россия зилзила оқибатларини бартараф этиш учун Мянмага 120 нафар қутқарувчи билан икки самолёт юборди.
Мьянма ҳарбий раҳбари Мин Аун Хлайн қурбонлар сони ортиши мумкинлигини айтиб, қутқарув ишлари давом этаётганини билдирди. Маълум бўлишича, шаҳарнинг кўплаб бинолари жиддий зарар кўрган, аҳоли эса очиқ ҳавода қолишга мажбур бўлган.
“Ҳаммамиз уйдан югуриб чиқдик, чунки ҳамма нарса силкина бошлади. Кўз олдимда беш қаватли бино қулаб тушди. Ҳамма кўчага чиқиб олган, бино ичкарисига киришга ҳеч кимнинг юраги бетламаяпти”, деди Мандалай аҳолисидан бири Reuters агентлигига.
Зилзила шунингдек, Таиланд, Ветнам ва Хитойда ҳам сезилди. Бангкокда қурилаётган осмонўпар бинонинг қулаши оқибатида 9 киши ҳалок бўлди.
