Мексика оммавий депортацияга тайёрланмоқда

Мексика президенти Клаудия Шейнбаум маъмурияти АҚШдаги ноқонуний муҳожирларни қўллаб-қувватлаш бўйича кенг кўламли дастурни ишга туширди. Дональд Трамп ваъда қилган АҚШ тарихидаги “энг йирик депортация операцияси”га тайёргарлик доирасида ҳукумат 2600 дан ортиқ адвокат ва 2200 консуллик ходимини сафарбар қилди.

"Биз ҳар доим Қўшма Штатлардаги мексикаликларни ҳимоя қиламиз, - деди Шеинбаум жума куни бўлиб ўтган матбуот анжуманида. - Президент Трамп лавозимга келганидан кейинги ҳар қандай мулоқотда АҚШдаги фуқароларимизни ҳимоя қилиш ҳамда мексикаликларнинг Америка иқтисодиёти учун қанчалик муҳимлигини кўрсатиш устувор вазифалардан бири бўлади".

Мексика Ташқи ишлар вазирлиги Қўшма Штатлардаги 53 консуллик ходимларини ишга туширди ва ҳибсга олиниши хавфи остида бўлган мигрантларга ёрдам бериш учун 24 соатлик “Контакт тугмаси” иловасини ишга туширди. Ҳукумат, шунингдек, чегара шаҳарларида бошпаналар тайёрламоқда ва депортация қилинганларга уйларига қайтишлари учун 2000 песо (тахминан 98 доллар) тўлашга ваъда бермоқда.

Мексика Марказий банки маълумотларига кўра, 2024 йилнинг ноябригача бўлган 12 ой ичида мигрантлар пул ўтказмалари 65 миллиард долларни ташкил этиб, мамлакатнинг энг муҳим даромад манбаларидан бирига айланди. 2024 йилда Қўшма Штатлар 190 491 мексикаликни депортация қилди, бу ўтган йилга нисбатан 11 фоизга кам.

"Қайтишга қарор қилган ёки қайтишга мажбур бўлганлар очиқ қўллар билан кутиб олинади ва дарҳол бизнинг ишчи кучимизга киритилади", - деди ташқи ишлар вазири Хуан Рамон де ла Фуэнте.

Мутахассисларнинг таъкидлашича, 11 миллион ноқонуний муҳожирнинг барчасининг Қўшма Штатлардан депортация қилиниши “логистик ва иқтисодий даҳшатли туш бўлади”. Мутахассисларнинг фикрича, муҳожирларнинг оммавий депортацияси кеклтириб чиқарадиган иқтисодий оқибатлар АҚШда норозиликларни келтириб чиқариши мумкин.