исроил Ғазодаги фаластинликларни қасддан оч қолдирмоқда – Amnesty International
Кеча, 18 август куни Amnesty International инсон ҳуқуқлари ташкилоти исроилни Ғазода фаластинликларга нисбатан атайин очлик сиёсатини юритишда айблади. Бу ҳақда Al Arabiya хабар берди.
Қайд этилишича, босқинчи исроил 22 ойлик уруш давомида Ғазо секторига гуманитар ёрдам киришини кескин чеклаб қўйган бўлса-да, бу айбловларни рад этиб келмоқда. Amnesty International томонидан эълон қилинган ҳисоботда кўчирилган фаластинликлар ва болаларни даволаган шифокорларнинг гувоҳликлари ҳам келтирилган. Унда айтилишича, сионистлар тизимли равишда мусулмонларни жисмонан йўқ қилишга қаратилган кампаниясини олиб боряпти. Бу эса Ғазода фаластинликларга қарши исроил геноцидининг бир қисмидир.
Ташкилот вакиллари сўнгги ҳафталарда вақтинчалик лагерларда яшаётган 19 нафар кўчирилган фаластинлик ҳамда Ғазо шаҳридаги 2 та касалхонада ишлаётган шифокорлар билан суҳбат ўтказган. исроил армияси ва Ташқи ишлар вазирлиги AFP нашрининг бу борадаги саволларига ҳозирча изоҳ бермаяпти.
