Ғазодаги қирғиннинг ташаббускори АҚШми?

Исроил армияси Ғазо секторидаги кенг кўламли ҳарбий амалиётлари орқали нафақат қонли қирғинни давом эттирмоқда, балки халқаро ҳамжамиятни чалғитиш учун сиёсий манипуляцияларни ҳам кучайтирмоқда.  

Оқ уй матбуот котибининг таъкидлашича, Исроил мазкур ҳужумларни амалга оширишдан олдин АҚШ маъмурияти билан маслаҳатлашган. Бунда кўринадики, Вашингтон нафақат бу тажовузнинг бевосита хабардори, балки унинг ҳомийси, аниқроғи, ташкилий қисми сифатида ҳаракат қилгани ҳам аён бўлмоқда.  

Оқ уй ўз позициясини "Исроил ўзини ҳимоя қилиш ҳуқуқига эга" деган баёнотлар билан оқлашга уринаётган бўлса-да, воқеилик шундан далолат бермоқдаки, Ғазо аҳолисига қарши уюштирилаётган қирғин Вашингтон томонидан тўғридан-тўғри қўллаб-қувватланмоқда.  

АҚШ президенти Доналд Трамп эса Ғазога қилинган ҳужумни қўллаб-қувватлаш билан чекланмай, "Дўзах эшиклари очилади" деган таҳдидли баёнот берди. Бу сўзлар фақат урушни рағбатлантириш учун хизмат қилади, тинчлик жараёни эса Вашингтоннинг хатти-ҳаракатлари туфайли йўққа чиқмоқда.  

АҚШ, Қатар ва Миср воситачилигида имзоланган оташкесим келишуви Исроил томонидан бузилди, бу эса АҚШнинг "тинчликпарварлик" даъволарининг мутлақо сохта эканини яна бир бор исботлади, дейиш мумкин.  

Ҳозирда тинч аҳоли оммавий қирғиннинг асосий қурбонига айланмоқда. Сўнгги маълумотларга кўра, 320 дан ортиқ одам ҳалок бўлган. ҲАМАС ва бошқа фаластинлик манбалар эса бу ҳужумлар асирларнинг ҳаётига ҳам хавф солаётганини билдирмоқда.