Ғазода ўт очишни тўхтатиш бўйича келишувга эришилди — Reuters

15 январь куни Исроил ва ҲАМАС Ғазодаги жангларни тўхтатиш ҳамда исроиллик гаровга олинганлар ва фаластинлик маҳбусларни озод қилиш бўйича келишувга эришди. Бу ҳақда Reuters агентлиги хабар берди.

Агентликнинг қайд этишича, келишув Яқин Шарқни остин-устун қилиб юборган 15 ойлик урушнинг эҳтимолий якунига йўл очади. Миср ва Қатар воситачилик қилган келишув Дональд Трамп инаугурацияси арафасида имзоланди.

Ҳозирча келишув расман эълон қилингани йўқ, бироқ бироқ бир неча соатлар ичида ошкор этилиши кутилмоқда.

Хабарларга кўра, ҲАМАС ўт очишни тўхтатиш келишуви эълон қилинганидан 24 соат ўтиб кучга киришини маълум қилган.

Ўт очишни тўхтатиш келишувининг биринчи босқичи барча аёллар ва болаларни ишғол қамоқларидан озод қилишни ўз ичига олади. Умрбод қамоқ жазосига ҳукм қилинган 250 нафар ва узоқ муддатли қамоқ жазосига ҳукм қилинган 250 нафар маҳбуснинг озод этилиши кутилмоқда.

Аввалроқ эҳтимолий келишув шартлари ва босқичлари ҳақида хабар берган эдик.