Ғазо секторидаги исроил ҳужумлари оқибатида 50 мингдан ортиқ инсон шаҳид бўлди

2023 йил 7 октябрдан бери давом этаётган исроил ҳарбий ҳужумлари натижасида Ғазо секторида шаҳид бўлганлар сони 50 мингдан ошди. Ғазо ҳукумати матбуот бюросининг маълумотларига кўра, қурбонларнинг аксариятини аёллар ва болалар ташкил этади.

Сўнгги расмий маълумотларга кўра, Ғазода 17 954 бола ва 12 365 аёл сионистлар армияси ҳужумлари натижасида шаҳид бўлган. 

Шунингдек, ҳалок бўлганлар орасида бир ёшга тўлмаган 1 150 нафар чақалоқ ҳам бор, улардан 274 нафари уруш даврида туғилган ва вафот этган. Умуман олганда, исроил қатлиоми натижасида барча аъзолари йўқ қилинган 2 165 та оила аҳоли рўйхатидан чиқарилган, 5 064 та оиладан эса фақат битта аъзо тирик қолган.

Ғазо секторидаги можаролар даврида 11 200 киши вайроналар остида қолган ёки бедарак йўқолган. Жабрланганлар сони эса 113 274 кишига етган. 

Шунингдек, исроил томонидан қамал қилинган ҳудудда инсонпарварлик ёрдами тўлиқ тўхтатилгани сабабли камида 52 киши очликдан, 17 киши, жумладан, 14 бола совуқдан ҳалок бўлган.