10.07.2025 06:25
46
Эрон афғон муҳожирларини жосусликда айблаб депорт қилмоқда
Сўнгги ҳафталар ичида юз минглаб афғонлар Эронни тарк этди.
Халқаро миграция ташкилоти (IOM) маълумотларига кўра, фақат июнь ойининг ўзида 256 мингдан ортиқ афғон Эрондан Афғонистонга қайтган.
Эрон расмийлари мамлакатда 6 миллиондан ортиқ афғон яшашини, уларнинг катта қисми ҳужжатсиз эканини маълум қилмоқда.
Шунингдек, июнь ойи ўрталарида бошланган Эроннинг Исроилга қарши 12 кунлик уруши ҳам муҳожирларнинг чиқиб кетишига таъсир қилган. Эрон давлат ОАВ ва ижтимоий тармоқларда тарқалган хабарларга кўра, номаълум миқдордаги афғон фуқаролари Исроил фойдасига жосусликда гумон қилиниб қўлга олинган.
Эронда яшовчи бир неча афғон муҳожир “Озодлик” ка маълум қилишича, жосуслик айблови билан ушланган афғон фуқаролари қўлга олингач тазйиққа учраган, сўнг эса ҳатто яроқли ҳужжатлари борлигига қарамасдан Афғонистонга депортация қилинган.
Бундан ташқари, январ ойидан буён Эрондан 800,000 дан ортиқ афғон қайтиб келган.
Шу билан бирга, Покистондан ҳам юз минглаб афғон муҳожирлари келмоқда – Покистон бу йил 3 миллион афғонни мамлакатдан чиқариб юборишни режалаштирмоқда.
Бу эса Афғонистондаги вазиятни янада мураккаблаштириши мумкин.
