Чеченистондаги педагогика коллежида янги масжид қурилди

Янги ўқув йили арафасида Грозний педагогика коллежи ҳудудида янги масжид очилди. Бу ҳақда Чеченистон Республикаси фан ва таълим вазири Ҳожи-Бауди Дааев маълум қилди.

90 квадрат метр майдонни эгаллаган масжидда юздан ортиқ киши намоз ўқиши мумкин. Масжиднинг очилиши натижасида талабалар ва ўқитувчилар таълим муассасасидан чиқмасдан, қулай шароитларда ибодат қилиш имкониятига эга бўлишди.

Вазир Дааев ушбу ташаббусни талабалар ва ўқитувчилар учун катта совға эканини таъкидлаб, лойиҳани амалга оширган Аҳмат Қодиров жамғармасига миннатдорлик билдирган.

Шунингдек, Грозний шаҳар ҳокимлигининг маълум қилишича, ҳозирда ҳудудда 11 та йирик диний иншоот — саккизта масжид ва учта мадраса қурилмоқда. Шаҳар мэри Хас-Магомед Қодиров ҳукумат диний таълим ривожига катта эътибор қаратаётганини таъкидлаган. Унинг сўзларига кўра, диний таълим ёшларни маънан юксак ва ахлоқли қилиб тарбиялашнинг ягона йўли бўлиб, уларда асл қадриятлар, анъаналар ва миллий маданиятга ҳурматни шакллантиради.

Маълумот учун, ҳозирги кунда Чеченистон ҳудудида 1,5 мингдан ортиқ масжид ва камида 430 мадраса фаолият юритмоқда.