16.08.2025 16:07
140
Британия Palestine Action тарафдорларини суд қилади
Лондон полициясининг хабар беришича, камида 60 киши Британияда тақиқланган, исроил ишғолига қарши курашган Palestine Action ҳаракатини қўллаб-қувватлагани учун судга тортилади.
Ҳаракат қиролликда "террористик гуруҳ" деб топилганидан кейин, унинг 700 дан ортиқ тарафдори қўлга олинган. Шу жумладан, ўтган дам олиш кунлари ҳам 522 киши ҳаракатга аъзоликда гумонланиб ушланган.
Олдинроқ уч нафар фаол июль намойишида қатнашгани учун терроризм тўғрисидаги қонун асосида айбланганди – уларни энди қамоқ жазоси кутмоқда.
Маълумот учун, 2020 йилда тузилган Palestine Action ҳаракати фаластинлик тинч аҳолини қирғин қилишда ишлатилаётган исроил қуролларини ишлаб чиқарувчи компанияларга қарши акциялари билан машҳур. Улар орасида Бристолдаги Elbit Systems заводига қилинган ҳужум ҳам бор. Бунинг ортидан заводда дрон ишлаб чиқариш тўхтаб қолганди.
