Бомбаланаётган Ғазо: 320-куннинг асосий воқеалари

Исроил Ғазо секторида босқинчилик ва қирғинбарот урушини бошлаганига 320 кун бўлди. 24 соат давомида Ғазо сектори, Иордан дарёсининг Ғарбий соҳили ҳамда бутун Яқин Шарқ ҳудудида содир бўлган асосий воқеалар.

▪️Босқинчилар Дайр ал-Балаҳ, Хон Юнис, Рафаҳ ва Жабалияга ҳужум қилди. Узлуксиз ҳужумлар натижасида 52 киши ҳалок бўлди. Уруш бошланганидан буён 40173 киши шаҳид бўлди.

▪️Ғарбий Соҳилда босқинчилар Наблус ва Халилга бостириб кирди. Бир киши ҳалок бўлди. Тулкармда бир бола ҳибсга олинди.

▪️Ғазо ҳукумати: Босқинчилар 24 соат ичида мактаб, бозор, телефон қувватлаш нуқтаси ва уйларга ҳужум қилишди. Биз нацистларни ва АҚШни қирғинлар учун тўлиқ жавобгар деб биламиз.

▪️Ғазода 25 йил ичида биринчи полиомиелит касаллиги қайд этилди, Фаластин Соғлиқни сақлаш вазирлигининг маълум қилишича, Иорданиядаги тестлар Дайр ал-Балаҳ шаҳрида эмланмаган 10 ойлик бола касалликка чалинганини тасдиқлади.

▪️Ал-Қассам бригадалари: Биз Ницарим ўқидаги таъминот линиясини бомбаладик, Тал ал-Султанда босқинчиларнинг техникасига ҳужум қилдик ва Рафаҳда босқинчиларни портлатиб юбордик.

▪️Бир кунда Ливандан Исроилга 135 та ракета учирилди. Уларнинг айримлари кўчманчиларнинг уй-жойларига тушиб, ёнғинларга сабаб бўлди. Қурбонлар борлиги хабар қилинди.

▪️Беньямин Нетаняху: "Бугун тунда кучларимиз ҲАМАС томонидан ўғирлаб кетилган олти кишининг: марҳум Абраҳам Мондер, марҳум Алекс Данзиг, марҳум Хаим Перри, марҳум Ягав Бучстаб, марҳум Ёрам Метсгер ва марҳум Надав Попплевел жасадларини топди".

▪️Кассам бригадалари ҲАМАС қўлида сақланаётган исроиллик маҳбусларнинг фотосуратларини чоп этиб, улар босқинчилар томонидан ўққа тутилиши натижасида ҳалок бўлганликларини маълум қилди.

▪️Босқинчилар Ливан жанубидаги Бекаа водийсига ҳужум қилди. 1 киши ҳалок бўлди, 19 киши яраланди, улардан 5 нафари болалар.

▪️33 фаластинлик маҳбус Исроил қамоқларидан озод қилинди. Озод қилинганларнинг ҳар бирида қаттиқ қийноқлар ва кучли чарчоқ аломатлари бор.