Бомбаланаётган Ғазо: 206-куннинг асосий воқеалари

Исроил Ғазо секторида босқинчилик ва қирғинбарот урушини бошлаганига 206 кун бўлди. 24 соат давомида Ғазо сектори, Иордан дарёсининг Ғарбий соҳили ҳамда бутун Яқин Шарқ ҳудудида содир бўлган асосий воқеалар.

▪️ Босқинчилар Ғазо ҳудудларини бомбардимон қилиш интенсивлигини оширди. Зарбалар Рафаҳ, Хон Юнис, Нусейрат лагери, Дайр ал-Балаҳ шаҳарларида амалга оширилган. Кун давомида 113 киши ҳалок бўлди.

▪️ Ғазо секторида 7 октябрдан бери давом этиб келаётган Исроил тажовузи оқибатида ҳалок бўлган фаластинликлар сони 34 454 нафарга етди, яна 77 575 нафари яраланди.

▪️ Исроил уруши бошланганидан бери Ғазо секторида 141 нафар журналист ҳалок бўлди.

▪️ Ғарбий Соҳилда 600 дан ортиқ кўчманчилар ишғолчи ҳарбийлар кўмагида Ал-Ақсо масжидини таҳқирлади. Кўчманчилар Қуддус бозорларига ҳам бостириб кирди.

▪️ Фаластин президенти Маҳмуд Аббос Ар-Риёдда бўлиб ўтган иқтисодий форум доирасида бўлиб ўтган махсус сессиядаги чиқиши чоғида Исроил чегараларда хавфсизликни тўлиқ таъминлаш, фаластинликлар эса ўз тақдири ўзи белгилаш ва мустақил давлатчилик ҳуқуқига эга эканини таъкидлади. У БМТга Фаластинни ташкилотга тўлақонли аъзо сифатида қабул қилишни сўраб мурожаат қилди, шунингдек, Европа давлатларини Фаластин давлатини тан олишга чақирди.

▪️ Le Monde: Франция Исроилга мудофаа экспортини минимал даражага туширди.

▪️ АҚШ президентлигига номзод Жилл Стейн Вашингтон университети талабалари томонидан Фаластин тарафдорлари намойишларида иштирок этаётган вақтда ҳибсга олинди.

▪️ Ал-Жазира: Ҳозирда 37 миллион тонна чиқинди йиғилган Ғазони тиклаш учун 200 йил керак бўлиши мумкин.

▪️ The New York Times: Халқаро жиноий суд Исроил расмийларини, жумладан Нетаняхуни ҳибсга олишга ордер беришга тайёрланмоқда.

▪️ Якшанба куни АҚШнинг турли ҳудудларида Фаластинни қўллаб-қувватлаб намойиш ўтказаётган 200 нафар талаба ҳибсга олинганидан сўнг жами ушланган талабалар сони 700 нафарга етди.