БМТ: 2014 йилдан бери Украина аҳолиси 10 миллион кишига камайди

2014 йилдан бери Украина аҳолиси тахминан 10 миллион кишига камайди (фақат 2022 йилдан бери – 8 миллионга). Сешанба куни Женевада журналистлар учун ўтказилган брифингда БМТ Аҳолишунослик жамғармаси вакили Флоренс Бауэр ушбу маълумотларни тақдим этди.

"Бу инсон капиталининг катта йўқотилишини англатади, биламизки, бу Украинанинг келажагини тиклаш ва қуриш учун жуда муҳим", - деди Бауэр.

Унинг сўзларига кўра, уруш Украина демографик муаммоларини янада оғирлаштирди: "Россиянинг тўлиқ миқёсли босқини" бошланганидан сўнг мамлакатда туғилиш кўрсаткичи ҳар бир аёлга битта болага тушди. Бауэрнинг қайд этишича, бу Европадаги энг паст, дунёда эса энг паст кўрсаткичлардан бири.

"Миллионлаб одамлар ўз уйларини ташлаб кетишди, 6,7 миллион киши қочқин сифатида хорижга кетди, Украинанинг кўплаб минтақалари аҳолиси камайди, асосан вояга етмаганлар, кексалар қолмоқда", - деди у.

Бауэр қуролли можаро қурбонларини ҳам эслади. БМТнинг Инсон ҳуқуқлари бўйича бошқармаси (ОHCHR) маълумотларига кўра, уруш пайтида камида 11973 нафар тинч аҳоли ҳалок бўлган.