ҲАМАС россиялик асирни озод қилишга ваъда берди

ҲАМАС ҳаракати Москвага Ғазодаги гаровга олинган Россия фуқаролиги Александр Труфановни озод қилишга қатъий ваъда берди, деб ёзади “РИА Новости” Россиянинг Исроилдаги элчиси Анатолий Викторовга таяниб.

Дипломат Труфанов Ғазода асирликда бўлган ягона россиялик эканлигини таъкидлади. Шу тариқа Викторов яна бир гаровга олинган Макс Харкиннинг Россия фуқаролигига эга эканлиги ҳақидаги аввалроқ матбуотда эълон қилинган хбарларни рад этди.

Нашрларнинг қайд этишича, Харкиннинг қариндошлари у қўлга олингандан сўнг фуқаролик олиши учун махсус Москвага келган.

«Россия-24» телеканали эфирида Викторов Труфанов жароҳат олган бўлиши мумкинлигини қўшимча қилди. Бироқ унинг аҳволи қониқарли деб баҳоланмоқда. Элчининг тахминича, эркак бир ой ичида озод этилиши мумкин.

ҲАМАС аввалроқ Труфанов ва Ғазода қолган бошқа гаровга олинганлар исроиллик аскарлар экани ва охир-оқибат тузилган алмашиш келишуви доирасида озод этилиши мумкинлиги ҳақида хабар берган эди.