AQShning The New York Times gazetasi Isroilning Gʻazoda olib borayotgan urushini yoritayotgan jurnalistlariga “genotsid” va “etnik tozalash” atamalarini ishlatishni cheklash hamda Falastinga nisbatan “bosib olingan hudud” iborasini ishlatmaslikni topshirdi. Shuningdek, “Falastin” soʻzini kamroq ishlatish va “qochqinlar chodirgohi” atamalaridan qochish ham buyurildi.

Hindistonda mʻyanmalik rohinja qochqinlari deportatsiya xavfiga duch kelishmoqda. 8 mart kuni Hindiston shimoli-sharqidagi Manipur shtati hukumati rohinja qochqinlarini deportatsiya qilish haqida buyruq berdi. Shtat gubernatori Biren Singx ijtimoiy tarmoqlarda uning hukumati “Hindistonga noqonuniy kirgan” qochqinlarning sakkiz kishilik birinchi guruhi deportatsiya qilinishini bildirdi. Mʻyanma hukumati bu borada Hindiston bilan hamkorlik qilishdan bosh tortgach, deportatsiya jarayoni toʻxtatildi. Biroq rohinjalar bu vaqtinchalik muammo, deb qoʻrqishmoqda.

Belʻgiya parlamentining sobiq deputati, oʻta oʻngchi Dris Van Langenxove yahudiylarga qarshi “nafrat va irqchilikni qoʻzgʻatish” aybi bilan bir yil muddatga qamaldi. U oʻzi tashkil etgan yoshlar harakati xabarlashuv guruhiga fashistlar ramzi (svastika) boʻlgan va kontslagerlardagi yahudiylar ustidan kulingan video va fotosuratlar joylashtirilgani uchun aybdor deb topildi.

UEFA bosh kotibi Teodor Teodoridis Isroil xuddi Rossiya singari futbol musobaqalaridan chetlashtiriladimi, degan savolga: “Isroil va Rossiyaning pozitsiyasi boshqa-boshqa. Isroil turnirlardan chetlashtirilmaydi”, ‑ deya javob berdi

Ozarbayjonning Evropa Kengashi Parlament Assambleyasi (PACE)dagi delegatsiyasi tuzilmadagi faoliyatini toʻxtatdi. “Dunyoda hech kim, shu jumladan, bu xonada oʻtirganlar ham Ozarbayjon bilan tahdid va shantaj tilida gapira olmaydi. PACE tarixida hech qachon bu tashkilot oʻzini bunday uyatsiz tutmagan. Evropa Parlament Assambleyasida vujudga kelgan chidab boʻlmas irqchilik, ozarbayjonofobiya va islomofobiya muhitiga qaramasdan, Ozarbayjon delegatsiyasi keyingi xabarnomaga qadar Evropa Parlament Assambleyasidagi oʻzaro hamkorligi va ishtirokini toʻxtatishga qaror qildi”, — deyiladi Ozarbayjon delegatsiyasi bayonotida.