Qirgʻiz bokschisiga yordam bergan oʻzbekistonlik murabbiy medalʻ bilan taqdirlandi

Parijdagi Olimpiadada bronza medalini qoʻlga kiritgan qirgʻizistonlik bokschi Munarbek Seyitbek uuluga musobaqalar vaqtida sekundantlik qilgan oʻzbekistonlik murabbiy Akmal Hasanov Chingiz Aytmatov medali bilan taqdirlandi. Bu haqda 24.kg “Chingiz Aytmatov nomidagi Issiqkoʻl forumi” xalqaro jamoat birlashmasi bosh kotibi Assol Moldokmatovaga tayanib maʻʻlum qildi.

Uning taʻʻkidlashicha, gumanizm, bagʻrikenglik, insonparvarlik va xalq diplomatiyasining yuksak saviyasi uchun oʻzbekistonlik murabbiy Akmal Hasanovni mukofotlash toʻgʻrisidagi qaror 5 avgust kuni qabul qilingan.

“Akmalga insoniyligingiz, birodarlik munosabatingiz uchun rahmat aytamiz. Qadrlaymiz, hurmat qilamiz, olqishlaymiz. Tashrifingizni intiqlik bilan kutamiz. Siz barcha maqtov va mukofotlarga loyiqsiz”, — dedi Assol Moldokmatova.

Eslatib oʻtamiz, Qirgʻiziston tarixida ilk bor Olimpiada yarim finaliga chiqqan bokschi Munarbek Seyitbek uulu uchun oʻzbekistonlik murabbiy Akmal Hasanov sekundant boʻlib harakat qilgandi.

Bokschining shaxsiy murabbiyi esa viza va tashkiliy muammolar sababli Qirgʻiziston delegatsiyasi roʻyxatiga kiritilmay qolgandi.

Akmal Hasanovning oʻzi OAVga Munarbek Seyitbek uuluning Oʻzbekistonga yigʻinga tez-tez kelib, oʻzbekistonlik sportchilar bilan mashgʻulotlarda ishtirok etgani uchun tanishini aytgan.

“Munarbek biz bilan mashgʻulot oʻtkazdi, Olimpiadaga bir oʻzi keldi. U mendan yordam berishimni iltimos qildi. Qoʻshni davlatlarimiz doʻstona munosabatlarga ega ekan, biz unga yordam berishdan xursand boʻldik. U tarixga kirdi va Qirgʻiziston tarixidagi boks boʻyicha birinchi Olimpiada sovrindori boʻldi”, — dedi Akmal Hasanov.

Mutaxassis qirgʻizistonlik bokschiga raqiblarni tahlil qilish va mashgʻulotlarda yordam berayotganini maʻʻlum qilgan.