Ўзбекистонликлар Украинада компания ташкил этиш бўйича иккинчи, Киевда - биринчи

2022 йил март ойидан бери Украинада 101 мамлакатдан келган хорижликлар 3075 та компанияга асос солди. Бу ҳақда Украинанинг “Опендатабот” очиқ маълумотлар порталида сўз боради.

Уруш давом этаётганига қарамасдан, Украинада энг кўп турк тадбиркорлари томонидан компаниялар ташкил этилган. Улар шу даврда очилган 396 та компанияга тўлиқ ёки қисман эгалик қилиб келмоқда. Бу янги хорижий тадбиркорлик субъектларининг умумий сонининг 12,9 фоизини ташкил этади.

Ўзбекистонликлар эса 312 та компания (жами кўрсаткичнинг 10,1 фоизи) билан иккинчи ўринда. Польша фуқаролари кучли учликни ёпди – 224 та корхона ёки 7,3%.

Шунингдек, кучли ўнталикка АҚШ, Қозоғистон, Германия, Озарбайжон, Исроил, Британия ва Хитой фуқаролари кирган.

Бундан ташқари, мулкдорлари хорижликлар бўлган компанияларнинг қарийб ярми пойтахт Киевда рўйхатга олинган – 1517 та. Украина пойтахтида энг кўп Ўзбекистон фуқаролари тадбиркорлик фаолиятини ташкил этган – 175 та компания.

Кейинги ўринда Львов вилояти - 460 та корхона: ушбу ҳудудга энг кўп Польшадан келган чет элликлар жойлашган (105 компания). Одесса вилояти ҳам кучли учликка кирди - 273 та компания. Ушбу минтақада компанияларни кўпинча Туркия фуқаролари ташкил қилган - 99 та корхона.

Хорижий мулкдорларга эга компанияларнинг энг катта қисми улгуржи савдо билан шуғулланади - 30,7 фоиз, кўчмас мулк билан операциялар - 6,7 фоиз ва компьютер дастурлаш - 5,8 фоиз.

Мавзуга алоқадор

Энг кўп ўқилган

Тавсия қилинган