Ўзбекистон президенти Эроннинг Тошкентдаги элчихонасига ташриф буюрди
Ўзбекистон президенти Шавкат Мирзиёев 21 май куни Эрон Ислом Республикасининг элчихонасига ташриф буюриб, мамлакат шимолида вертолёт қулаши оқибатида президент Иброҳим Раисий ва унга ҳамроҳлик қилган шахслар фожиали ҳалок бўлгани муносабати билан дўст Эрон халқига чуқур ҳамдардлик билдирди. Бу ҳақда давлат раҳбури матбуот хизмати хабар қилди.
Давлат раҳбари дипломатик ваколатхонада очилган Ҳамдардлик
китобига самимий таъзия ва таскин сўзларини ёзиб қолдирди.
Ўзбекистон етакчиси элчи Муҳаммадали Искандарий билан қисқа
суҳбатда Президент Иброҳим Раисий етук давлат арбоби ва сиёсатчи бўлгани,
Эроннинг барқарор ижтимоий-иқтисодий ривожланишига, аҳоли фаровонлигини
оширишга ҳамда мамлакатнинг халқаро обрўсини мустаҳкамлашга, шунингдек,
давлатларимиз ўртасида ўзаро манфаатли кўп қиррали ҳамкорликни кенгайтиришга
улкан ҳисса қўшганини алоҳида таъкидлади.
Матбуот хизмати томонидан эълон қилинган фотосуратларга кўра, президент Шавкат Мирзиёевга Ўзбекистон бош муфтийси Нуриддин Холиқназаров ҳам ҳамроҳ бўлган ва ўтганларнинг ҳаққига Қуръон тиловат қилинган.
Куни кеча Ўзбекистон президенти Эроннинг Олий диний раҳбари оятуллоҳ Али Хоманеийга
ҳамдардлик мактуби йўллаган эди.
Мавзуга алоқадор
-
Ўзбекистон Республикаси Президенти Шавкат Мирзиёев Эрон шимолида юз берган фожиа оқибатида Эрон Ислом Республикаси Президенти Иброҳим Раисий ва унга ҳамроҳлик қилган шахсларнинг вафот этгани муносабати билан ушбу мамлакат Олий диний раҳбари оятуллоҳ Али Хоманеийга ҳамдардлик билдирди.
-
Эрон президенти Иброҳим Раисий вертолёт ҳалокати натижасида вафот этгани муносабати билан мамлакатда 5 кунлик мотам эълон қилинди. Шунингдек, Туркия, Сурия, Ливан, Ироқ, Ҳиндистон, Покистон ва Тожикистонда ҳам миллий мотам эълон қилинди.
