Тошкентдаги Россия университети филиалида рус тарғиботи кетяптими?

Meduza нашри Губкин номидаги Россия давлат нефт ва газ университетининг Тошкент шаҳридаги филиалида таҳсил олувчи талабанинг хатини эълон қилганди. 

Хатда ҳар ҳафта университетда пропагандага асосланган маърузалар ўқилиши ҳамда кекса авлод вакиллари талабаларга Украинадаги "Махсус ҳарбий операция" ва РФнинг жасур аскарлари ҳақида сўзлаб бериши айтилган. 

Талаба ўз мурожаатида ҳатто Дин ишлари бўйича марказ ходимининг рус армияси сатанистларга қарши урушаётгани ҳақидаги сўзларидан ҳам иқтибос келтирган. 

Кеча, 14 апрель куни Губкин номидаги университетнинг Тошкент шаҳридаги филиали мазкур хат юзасидан муносабат билдириб чиқди.

Унда "мурожаатда номи тилга олинган шахс филиал талабалари рўйхатида мавжуд эмаслиги" таъкидланган.

Филиал ОАВ ва жамоатчилик вакилларидан тасдиқланмаган маълумотларни тарқатмасликни сўраган.