Қозоғистон, Озарбайжон ва Ўзбекистон "яшил" энергетикани ривожлантириш учун кучларни бирлаштирди

СOP 29 Бутунжаҳон иқлим саммити доирасида Шавкат Мирзиёев, Қосим-Жомарт Токаев, Илҳом Алиев Ўзбекистон, Қозоғистон ва Озарбайжон ўртасида "яшил" энергия ишлаб чиқариш ва узатиш соҳасида стратегик шериклик тўғрисидаги битимни имзоладилар. Бу ҳақда DKnews.kz хабар берди.

Қайд этилишича, мазкур ҳодиса барқарор ривожланишга интилиш тарихида янги саҳифа бўлади.

“Стратегик шериклик тўғрисидаги битимнинг имзоланиши Марказий Осиё ва Жанубий Кавказ минтақаларини ривожлантириш бўйича уч томонлама ҳамкорликнинг муҳим босқичидир. Ҳужжат давлатларимиз энергетика тизимларини интеграциялашуви, шунингдек, Европа ва бошқа бозорларга экологик тоза энергия етказиб бериш бўйича ишончли йўлакларни яратиш учун янги имкониятлар очади... Ушбу муҳим йўналишдаги яқин ҳамкорлик уч давлат ўртасида тажриба ва илғор технологиялар алмашинувини кучайтиради ва энергия хавфсизлигимизни янада мустаҳкамлайди”, - деди Қозоғистон раҳбари Қосим-Жомарт Токаев.

Мазкур давлатлар қазилма бойликларга қарамликни камайтириш, технологик инновацияларни ривожлантириш ва экологик барқарорликни қўллаб-қувватлай оладиган инфратузилмани яратиш устида фаол иш олиб бораётгани таъкидланди. 

Президент Илҳом Алиев бугунги келишув уч мамлакат ўртасидаги қардошлик ва стратегик шериклик муносабатларини янги босқичга кўтаришини таъкидлади.

“Марказий Осиё ва Кавказ минтақалари кўплаб масалалар, жумладан, яшил энергияни ривожлантириш соҳасида ҳам синхрон иш олиб боради. Биз Ўзбекистон ва Қозоғистонда қайта тикланадиган энергия манбаларини яратиш бўйича катта режалар ва эришилган натижалар ҳақида биламиз”, - деди Илҳом Алиев.

Ўз навбатида, Ўзбекистон президенти ушбу шартнома нафақат иқтисодий мақсадни кўзлаши, балки келажакка қўшиладиган умумий ҳисса эканлигини таъкидлади.

“Мен ушбу лойиҳанинг экологик аҳамиятини алоҳида таъкидлаган бўлардим. Ўтказиладиган энергия шамол ва қуёш энергияси бўлади ва иқлимга таъсирни юмшатишга ёрдам беради. Бу орқали биз Париж келишуви доирасида иқлимни муҳофаза қилиш ва Барқарор ривожланиш мақсадларига эришиш бўйича биргаликдаги саъй-ҳаракатларни қўллаб-қувватлаймиз”.

Бундан ташқари, давлат раҳбарлари иштирокида Ўзбекистон энергетика вазири Журабек Мирзамахмудов, Қозоғистон энергетика вазири Алмасадам Саткалиев, Озарбайжон энергетика вазири Парвиз Шаҳбазов ва Саудия Арабистони энергетика вазири Абдул Азиз бин Салмон иштирок этди. Ал Сауд яшил энергияни ривожлантириш ва узатиш соҳасидаги ҳамкорлик бўйича Ижроия дастурини имзолади.