Қорачой-Черкасда ҳам ниқоб вақтинчалик тақиқланди
Қорачой-Черкас мусулмонлари диний бошқармаси ҳам республикада ниқобни вақтинчалик тўғрисида қарор қабул қилди. Бу ҳақда ТАСС агентлигига Қорачой-Черкас республикаси муфтийси, Шимолий Кавказ мусулмонлари фаолиятини мувофиқлаштириш маркази раиси Исмоил Ҳожи Бердиев маълум қилди.
Унинг
тушунтиришича, фатво Шимолий Кавказ мусулмонларини мувофиқлаштириш маркази
муфтийлар кенгашининг ҳижоб ва ниқобга оид қарорига мувофиқ қабул қилинган.
“Қорачой-Черкас
муфтийлиги республикада ниқобни тақиқлаш тўғрисида қарор қабул қилди, шариатга
кўра, юзни бутунлай яширадиган кийим кийиш мумкин эмас”, — деди Бердиев.
Шундай
қилиб, Қорачой-Черкес Республикаси Доғистондан кейин Россияда юзни яширадиган
кийимларни тақиқлаган иккинчи минтақага айланди.
Ниқоб —
аёл кишининг юзини ёпиб турувчи бош кийими ҳисобланади ва кўзлар учун тирқиши
бўлиб, бутун бадан ва юзни қоплайди, фақат кўзлар очиқ қолади.
Аввалроқ
Доғистон муфтияти аёллар учун анъанавий мусулмон бош кийими бўлмиш ниқобни
вақтинчалик тақиқлаш тўғрисидаги фатвони эълон қилган эди.
Ниқоб
масаласи Махачқалъа ҳамда Дербентдаги черков ва синагогага ҳужумдан сўнг пайдо
бўлди. Дастлаб, Доғистон раҳбари Сергей Меликов хотин-қизларнинг юзини
беркитувчи кийимига қарши эканини айтиб чиқди. Сўнгра Доғистон муфтийси Аҳмад
Абдуллаев республикада ниқобни тақиқлаш мавзусини кўтариб, “аёлларни уйда
ўтиришга” чақирди.
Кўпчилик
уламолар янги фатвони танқид қилди, жумладан Волгабўйи мусулмонлари диний
бошқармаси бошлиғи Муқаддас ҳазрат Бибарсов мазкур воқеаларни
"мусулмонларга қарши ҳаракат", деб атади.
Маълумот
учун, шофийлик мазҳаби кенг тарқалган Кавказ ҳудудларида аёлларнинг ниқоб
тақиши вожиб амаллардан саналади.
Мавзуга алоқадор
-
Давлат Думаси депутатлари яқин орада юзни беркитувчи кийим, жумладан, ниқобни тақиқлаш борасидаги қонун лойиҳасига овоз беришади. Депутатларнинг фикрича, ниқоб тақиш жамоат жойларида кузатув камераларидан одамнинг юзини аниқлашни қийинлаштиради.
-
Доғистон муфтиятининг фатво бўлими ниқобни вақтинчалик тақиқлаш бўйича фатво чиқарди. Унга кўра, тақиқ республика аҳолиси хавфсизлигига таҳдидлар мавжудлиги сабаб қилиб кўрсатилди ва мазкур хавф-хатарлар бартараф этилиб, “янги фатво” чиққунига қадар амалда бўлади. Аввалроқ Доғистон муфтияти ниқобни бутунлай тақиқлаш учун етарлича исломий асослар топа олмаганини эълон қилган, бироқ анъанавий либосларни кийишни “маҳаллий даражада тақиқлаш”га рухсат берганди.
