Зеленский: "Қрим — бу Украина"

Украина президенти Владимир Зеленский Қрим мақомини муҳокама қилиш эҳтимолини қатъиян рад этди ва яриморол Украинага тегишли эканини таъкидлади.

“Бу — бизнинг ҳудудимиз, Украина халқининг ерлари. Бу борада гаплашишга ўрин йўқ — бу масала бизнинг Конституциямиз доирасидан ташқарида”, деди Зеленский Лондонда АҚШ ва Европа Иттифоқи вакиллари билан музокаралар бошланиши олдидан ўтказилган брифингда.

Давлат раҳбари шунингдек, Қрим ва бошқа босиб олинган ҳудудлар тўғрисидаги ҳар қандай музокаралар урушни фақат чўзиб юборишини урғулади.

Бунгача, The Washington Post газетаси Лондонда ўтказиладиган музокараларда АҚШ делегацияси Украина томонига Қрим устидан Россия назоратини тан олиш ва фронт чизиғини музлатиб қўйиш бўйича таклиф тақдим этиши мумкинлиги ҳақида хабар берган эди.

Зеленский, шунингдек, Запорожье атом электр станцияси (АЕС) устидан назоратни АҚШга ўтказиш ҳақидаги хабарлар юзасидан ҳам изоҳ берди. Унинг сўзларига кўра, станция фақат Украина бошқарувида қолиши керак.

“Агар АҚШ билан ҳамкорликда Запорожье АЭСни қайта тикласак ва электр энергиясидан биргаликда даромад олсак — бу табиий ва мақбул ҳолат. Аммо АҚШ Украинасиз станцияда ишлай олмайди”, деди Зеленский.

Эслатиб ўтамиз, аввалроқ АҚШ президенти Доналд Трамп Россия ва Украина ўртасида тез орада келишувга эришилишига умид билдирган эди.