16.05.2025 16:15
116
Украина зудлик билан ўт очишни тўхтатишга тайёр
Украина зудлик билан ўт очишни тўхтатишга тайёр, фақат Россия ҳам тинчлик шартларига амал қилиши керак. Бу ҳақда Истанбулдаги тинчлик музокараларига ташриф буюрган Украина мудофаа вазири Рустем Умеров айтиб ўтди.
Умеров бугун, 16 май куни АҚШ ва Туркия вакиллари билан учрашганидан сўнг у бошчилигидаги делегация “адолатли ва мустаҳкам тинчликка эришиш мақсадида Истанбулга келганини” маълум қилган.
Вазирнинг сўзларига кўра, Москва аниқ қадамларни қўйган тақдирдагина ўт очишни тўхтатишга эришиш мумкин: 30 кунлик сулҳга рози бўлиш, гуманитар чораларни маъқуллаш, украиналик болаларни ортига қайтариш ва “ҳамма учун” тамойили асосида маҳбусларни алмашиш шулар жумласидандир.
Истанбулдаги музокаралар Украина ва Россия вакилларининг 2022 йилдан буён биринчи тўғридан-тўғри мулоқотига айланиши кутилмоқда. Россия делегациясига президент ёрдамчиси Владимир Мединский бошчилик қилмоқда.
Бироқ Украина дипломатик манбасининг Sky News’га айтишича , Россия гўёки АҚШ ва Туркия иштирокисиз икки томонлама "яккама-якка" учрашув ўтказишни талаб қилган. Киев эса халқаро воситачиликни талаб қилиб, ушбу таклифни рад этган.
"Бу Москва тинчликни хоҳламаётганидан дарак беради. Улар бирор натижага эришиш учун эмас, балки музокараларни чўзиш учун келишган", деган манба.
Шу билан бирга, АҚШ президенти Доналд Трамп Россия етакчиси Владимир Путин билан “келишилган вақтда” учрашишга тайёрлигини билдирди. Бироқ у БААдаги дастуридан сўнг дарҳол Вашингтонга қайтишини айтиб, Истанбул музокараларида иштирок этишдан бош тортди. Унинг ўрнига АҚШ Давлат котиби Марко Рубио Туркияга келди.
