Сурияда олий муфтий тайинланди

Сурия президенти Аҳмад аш-Шаръ шайх Усома ар-Рифоийни мамлакатнинг янги олий муфтийси этиб тайинлади. Yeni Şafak нашрининг маълум қилишича, мазкур қарор Дамашқда бўлиб ўтган мусулмон уламоларининг диний анжумани доирасида қабул қилинган. 

Шунингдек, форумда 15 нафар етакчи олимдан иборат Фатво кенгаши тузилди, дейилади хабарда. 

Шайх Усома ар-Рифоий 1944 йилда Дамашқда туғилган. У таниқли уламо шайх Абдул ал-Карим ар-Рифоийнинг ўғли бўлиб, Дамашқ университетида таҳсил олган. 1971 йилдан Дамашқдаги Абдул ал-Карим ар-Рифоий масжидида имомлик қилган.

1981 йилда Сурияда диний гуруҳларга босим ортгани сабабли Саудия Арабистонига ҳижрат қилган. 2011 йилда Суриядаги қўзғолонни қўллаб-қувватлагани учун тазйиққа учраган ва 2012 йилда Туркияга кўчиб ўтган. Кейинчалик Шайх Усома ар-Рифоий Истанбулда “Сурия Исломий Кенгаши”ни тузиб, унга раҳбарлик қилган.