Испания суррогат оналик орқали туғилган болаларни рўйхатга олишни тақиқлади
Испания ҳукумати хорижда суррогат оналар орқали туғилган болаларни ўз элчихона ва консулликларида рўйхатдан ўтказишни тақиқлади. Бу ҳақда Politico нашри хабар қилди.
Билдирилишича, янги тартиб дипломатларга хорижий давлатлар томонидан берилган туғилганлик гувоҳномаларини қабул қилишни ҳам ман этади. Шунингдек, аввал бошланган, аммо тугалланмаган рўйхатга олиш жараёнлари ҳам бекор қилинади.
Европанинг айрим давлатларида тақиқланган суррогат оналикни испан фуқаролари бошқа мамлакатларда қонуний йўл билан амалга ошириб, фарзандларни рўйхатга олиш орқали чекловларни айланиб ўтишга ҳаракат қилишган.
Бу ҳолат Испанияда 2006 йилдан бери тақиқланган бўлишига қарамай, хориждаги суд қарорлари орқали амалга ошиб келаётган эди.
Бироқ 2023 йил декабр ойида Олий суд бундай ҳуқуқий механизмни ноқонуний деб топди. Ушбу қарорга жавобан бош вазир Педро Санчес бошчилигидаги ҳукумат суррогат оналикни аёллар эксплуатациясининг бир шакли, болани эса “товар”га айлантирувчи восита сифатида танқид қилмоқда.
Янги қоидаларга кўра, бола фақат Испанияга олиб келинганидан сўнг ва биологик алоқага эга ота ёки онанинг аризаси асосида рўйхатдан ўтказилиши мумкин.
Йил якунигача эълон қилиниши кутилаётган одам савдосига қарши қонун лойиҳасида суррогат оналик амалиётини янада қатъий тартибга солиш назарда тутилмоқда. Шу билан бирга, Грецияда ҳам ёлғиз эркаклар ва бир жинсли эркак жуфтликлар учун суррогат оналикни тақиқловчи қонун кутилмоқда.
Маълумот учун, суррогат оналик — бу учинчи шахс (суррогат она) бошқа шахслар учун ҳомиладорликни кўтариб, фарзанд туғиб берадиган репродуктив амалиётдир. Кўплаб мамлакатларда бундай ёндашув ҳуқуқий, ахлоқий ва инсон ҳуқуқлари нуқтаи назаридан баҳсли ҳисобланади.
