11.02.2025 10:28
Google Хариталарда "Мексика кўрфази" "Америка кўрфази"га айланди
Google Хариталар хизмати АҚШ фойдаланувчилари учун Мексика кўрфазини расман "Америка кўрфази" деб номлай бошлади. The Verge нашрининг хабар беришича, бу ўзгариш президент Дональд Трамп маъмуриятининг тегишли қарорига асосан амалга оширилган.
Трамп 2025 йил 25 январда Мексика кўрфазининг номини "Америка кўрфази" деб ўзгартириш ҳақида фармон имзолаган. Шу асосда Google Хариталарда АҚШдан кирувчи фойдаланувчилар учун янги ном акс эта бошлади. Мексикадаги фойдаланувчилар учун эса кўрфазнинг аввалги номи сақланиб қолади, бошқа мамлакатларда эса иккала ном кўрсатилади.
Шунингдек, АҚШ Федерал Авиация Маъмурияти (FAA) ҳам мамлакат авиация хариталарида "Америка кўрфази" номидан фойдаланишини маълум қилди. Бундан ташқари, Аляскадаги Денали чўққиси яна Мак-Кинли деб номланиши ҳам режалаштирилган.
