Дунё бўйлаб Рамазон Ҳайити қандай нишонланди?

Мусулмон мамлакатлар бу йилги Рамазон Ҳайитини катта хурсандчилик билан қарши олди. Турли давлатларда миллионлаб инсонлар Ҳайит  намозида иштирок этиб, эзгулик ва барака тилаб дуо қилдилар.  

Масалан, Афғонистон ва Сурияда давлат раҳбариятининг иштирокида намоз ўқилди. Япониянинг Токио марказий масжидида эса, намоз уч кун кетма-кет адо этилди. 

Муқаддас Рамазон Ҳайити Қатар, Қозоғистон, Қирғизистон, Покистон, Гуржистон ва Ироқ – Курдистон минтақасида ҳам кенг миқёсда нишонланди. Масжидларда намоз ўқилиб, хайрия тадбирлари ўтказилди. Фаластинда мусулмонлар Масжидул Ақсода ибодат қилиб, Яратгандан тинчлик-осойишталик сўраб дуолар қилдилар. 

Шунингдек, Туркия Президенти Ражаб Тоййиб Эрдўған байрам муносабати билан бутун мусулмон дунёсини табриклади. 

Саудия Арабистони маълумотларига кўра, Рамазон ойида Макка ва Мадинадаги икки муқаддас масжид – Масжидул-Ҳаром ва Масжидун-Набавий  122 286 712 мусулмонни қабул қилди.  

Шунингдек, ушбу даврда 16 558 241 зиёратчи умра ибодатини адо этди. Масжидул-Ҳаромда 75 573 928 мусулмон намоз ўқиган бўлса, Масжидун-Набавийда бу кўрсаткич 30 154 543 кишини ташкил этди.  

Саудия Арабистони Рамазон давомида зиёратчилар учун барча шароитларни яратганини ва муқаддас ибодатларни бажариш жараёни хавфсиз ва тартибли ташкил этилганини таъкидлади.