Рамазон ҳайити муносабати билан 488 маҳбус афв этилди

Президент Шавкат Мирзиёев Рамазон ҳайити муносабати билан қилган жиноятидан чин кўнгилдан пушаймон бўлган ва тузалиш йўлига ўтган 488 нафар маҳбусни афв этиш тўғрисида фармон имзолади, деб ёзади Gazeta.uz.

Уларнинг 100 нафари жазодан тўлиқ озод этилди, 268 нафари эса шартли равишда муддатидан аввал озод қилинди. Шунингдек, 34 маҳбуснинг жазоси енгилроғига алмаштирилди, 86 нафари эса қисқартирилган жазога эга бўлди.

Афв этилганлар орасида 17 нафар чет эллик фуқаро, 37 нафар аёл, 60 ёшдан ошган 37 нафар эркак, 167 нафар ёшлар (жумладан, 1 нафар вояга етмаган) ва 5 нафар тақиқланган ташкилотлар фаолиятида қатнашган шахслар бор.

Афв қилинганларни оила ва жамиятга мослашишига кўмаклашиш мақсадида тегишли давлат идораларига зарур чора-тадбирларни амалга ошириш бўйича топшириқлар берилди.