АҚШ Хитой товарларига бож ставкаларини 104% гача оширди

АҚШ ҳукумати Хитойдан импорт қилинадиган товарларга қўйиладиган бож ставкаларини 104 фоизгача оширгани маълум қилинди. Бу ҳақда Оқ уйнинг матбуот котиби Каролин Левитт хабар берди.  

Янги тарифлар бугундан расман кучга кирган. 

Таҳлилчилар мазкур қарор АҚШ ва Хитой ўртасидаги савдо урушининг реал тасдиғи дея баҳоламоқда. Аввалроқ, Трамп агар Хитой АҚШ товарларига қўйган 34 фоизлик жавоб божларини бекор қилмаса, қўшимча 50 фоизлик тарифлар жорий этилишини айтган эди.  

Оқ уйнинг матбуот котиби айтишича, Трамп Хитой билан келишувга эришишга тайёр, аммо Пекин ҳозирча бундай ташаббус кўрсатмаган. Агар Хитой музокараларга киришса, АҚШ “ғайритабиий сахийлик” кўрсатиши мумкин, деб таъкидланган.  

Хитой Ташқи ишлар вазирлиги эса, “АҚШнинг божлар орқали босим ўтказиш сиёсати мутлақо нотўғри ва биз бунга қаттиқ қаршилик кўрсатамиз”, деб хабар қилди.  

Экспертларнинг фикрича, АҚШ-Хитой савдо урушининг кучайиши глобал иқтисодиётга салбий таъсир кўрсатиши мумкин, чунки бу нархларнинг ошишига ва занжирли реакцияларга олиб келади.