Салафлар қалб ҳақида
Тобеинлардан Мужоҳид ибн Жабр раҳимаҳуллоҳ айтади:
"Қалбни инсон кафтига менгзатса бўлади; киши бир гуноҳ
қилса қалбидан бир бармоқ букилади, яна бир гуноҳ қилса яна бири ҳатто, ҳамма
бармоғи букилгач, муштдек қотади-да, кейин унга муҳр урилади..." Ҳилятул
авлиё китоби, 3/282.
* * *
Макҳул Димашқий раҳимаҳуллоҳ:
"Энг кам гуноҳ қилганлар энг қалби юмшоқ
кишилардир". Имом Аҳмаднинг Зуҳд китоби, 463-бет.
* * *
Умар ибн Солиҳ раҳимаҳуллоҳ: "Аҳмад ибн Ҳанбалдан
сўрадим:
- Қалб нима билан юмшайди?
Менга қараб-қараб тургач, жавоб берди:
- Нима билан бўлар эди, ҳалол ейиш билан". Табақотул
ҳанобила, 1/219.
* * *
Яҳё ибн Муоз раҳимаҳуллоҳ:
"Қалблар озуқаси зикр (Аллоҳнинг зикри), ақллар озуқаси
фикрдир". Тарихи Бағдод, 2/136.
* * *
Масруқ ибн Аждаъ раҳимаҳуллоҳ:
"Кимки қалби ичидаги кечинмаларига Аллоҳни назоратчи
қилса, Аллоҳ уни хатти-ҳаракатларида муҳофаза қилади". Сифатус сафва,
4/368.
* * *
Яҳё ибн Муоз раҳимаҳуллоҳ:
"Қалблар худди қайнаб турган қозонга ўхшайди, чўмичлари
эса тиллардир. Кишининг нима дейишига боқинг, чунки унинг тили қалбида қайнаб
турган нарсани беради: ширин бўлсин, нордон бўлсин, аччиқ бўлсин, чучук
бўлсин". Ҳилятул авлиё, 10/63.
* * *
Иброҳим Хаввос раҳимаҳуллоҳ:
"Қалб давоси беш нарсадир: Қуръонни тадаббур ила
(оятлар мағзини чақиб) ўқиш, қоринни холи-оч қилиш, тунги намоз, саҳарги
тазарру, солиҳлар билан ўтириш". Заммул ҳаво, 70-бет.
* * *
Ибн Ражаб раҳимаҳуллоҳ:
"Тақво ва акси бўлмиш фужурнинг асоси қалбдир. Қалб
иффатли бўлиб тақво қилса, аъзолар ҳам покизалашади, қалб бузилса, аъзолар-да
бузилади". Жомиул улуми вал ҳикам, 1/229.
Эй Раббим! Ўзинг қалбимизни ислоҳ қил! Омин.
Мавзуга алоқадор
-
Умар ибн ал-Хаттоб даврларида у кишининг ҳузурларига уч киши мискин бир йигит билан кириб шундай дейишди: "Эй мўъминлар амири, мана бу йигитдан биз учун қасос олишингизни сўраймиз, сабаби бу инсон бизни отамизни ўлдирди".
-
Аммо мен тушунмайдиган нарса шуки, нега энди Рамазондаги хулқимиз бошқа ойларга ўтмайди?! Нега энди йил бўйи Рамазондаги каби ибодатга берилмаймиз?! Нега энди бомдодларда тўлиб турган масжид Рамазон чиқиши билан ярмидан ҳам камайиб кетади?! Нега энди Қуръонни умр китоби эмас, Рамазон китоби деб қараймиз?! Нега энди бошқа ойларда садақа бериш учун фақир қидирмаймиз?! Фақирлар бошқа ойларда овқат ейишмайдими?!
