Шри-Ланка ҳукумати мусулмонлардан узр сўради
23 июль куни Шри-Ланка ҳукумати пандемия даврида COVID-19 қурбонлари мажбурий куйдирилгани учун оролдаги мусулмон озчиликдан расман узр сўради. Бу қарор ЖССТнинг исломий расм-русумларга мувофиқ дафн қилиш хавфсиз экани ҳақидаги кафолатларига қарамай қабул қилинган эди.

Ҳукумат баёнотида айтилишича, янги қонун келажакда мусулмонлар ёки бошқа жамоаларнинг дафн маросимлари бузилмаслиги учун дафн этиш ёки кремация қилиш ҳуқуқини кафолатлайди.

Шри-Ланка мусулмонлари кечирим сўрашни мамнуният билан қабул қилишди, бироқ уларнинг бутун жамоаси, яъни оролнинг 22 миллион аҳолисининг тахминан 10 фоизи ушбу воқеалардан ҳалигача қалбларида оғриқ борлигини айтишди.

“Энди биз ҳукуматнинг мажбурий кремация сиёсати ортида турган икки академик - Меттика Витҳанаге ва Чанна Жаясуманага нисбатан қонуний чоралар кўрамиз. Биз товон пулини ҳам талаб қиламиз”, – деди Шри-Ланка мусулмонлар кенгаши матбуот котиби Ҳилми Аҳамед.

Ўша пайтдаги президент Готабая Ражапакса унинг маъмурияти БМТ Инсон ҳуқуқлари кенгаши ва бошқа форумларда мусулмонларнинг дафн маросими меъёрларини бузгани учун халқаро қоралашларга дуч келган бир пайтда дафн қилишни тақиқлаган эди.

Шу ой бошида чоп этилган китобида у ўз ҳаракатини фақат тиббий маълумотга эга бўлмаган табиий ресурслар профессори Витҳанагенинг “мутахассис маслаҳатига” амал қилганини ва COVID қурбонларини дафн этишга рухсат бермаслигини айтиб оқлаган.

Ражапакса 2021 йил февраль ойида мажбурий кремация сиёсатини тугатди ва олис Оддамавади минтақасида қаттиқ ҳарбий назорат остида ва қурбонларнинг қариндошлари иштирокисиз дафн қилишга рухсат берганди.

Мавзуга алоқадор

Энг кўп ўқилган

Тавсия қилинган