Тожикистон Россияга норозилик билдирди
Тожикистон Ташқи ишлар вазирлиги Россиянинг Душанбедаги элчиси Семён Григорьевга Тожикистон фуқароларининг РФдаги ҳуқуқлари поймол этилишига қарши норозилик нотасини топширди. Бу ҳақда Тожикистон ТИВ хабарида айтилади.
Россиялик дипломатга РФ ҳудудида Тожикистон фуқароларига нисбатан “қатъий салбий муносабат”нинг оммавий намоён бўлиши, шунингдек, уларнинг ҳуқуқ ва эркинликлари кенг миқёсда бузилиши ҳолатларидан жиддий хавотир билдирилган.
“Нотада таъкидланишича, бундай ҳаракат фақат Тожикистон фуқароларига нисбатан қўлланилади, бу тожик-Россия муносабатлари руҳи ва анъаналарига тубдан мос келмайди”, — дея таъкидлади Тожикистон ТИВ.
Эслатиб ўтамиз, сўнгги вақтларда Россия чегаралари ва аэропортларида минглаб Тожикистон фуқароларининг мамлакатга киришига чекловлар ўрнатилмоқда. Улар орасида Россия ҳукумати ҳисобига таҳсил олаётган тожикистонлик талабалар ҳам бор.
Мавзуга алоқадор
-
Юзлаб тожикистонликлар бир неча кундан буён Россия-Қозоғистон давлат чегаралари ўртасидаги бетараф ҳудудда қолиб кетмоқда. Рус чегарачилари тизимда носозлик рўй берганини айтиб, уларни ортга қайтармоқда, айни пайтда болалар, 60 ёшдан ошганлар ва бошқа давлатлар фуқароларини ўтказиб юбормоқда. Ортга қайтмоқчи бўлганлардан эса қозоқ чегарачилари Россияга киритилмагани тўғрисида ҳужжат талаб қилиб, ўтказмаяпти.
-
Мингга яқин Тожикистон фуқароси Москванинг бир қанча аэропортида қолиб кетмоқда. Улар орасида Россия ҳукумати ҳисобидан таҳсил олаётган тожик талабалари ҳам бор. Узоқ кутишлардан сўнг уларнинг бир қисми – 322 нафари РФ ҳудудига киритилган бўлса, 306 нафарини мамлакатдан чиқариб юбориш режалаштирилган. Тожикистон ТИВ фуқароларни Россияга сафар қилишдан тийилишга чақирмоқда.
