Turkiyalik advokat Ibrohim Ergin: Mubashshir Ahmad hech bir qonunni buzmagan!

 

Mubashshir Ahmadning hibsga olinishi masalasida Turkiya Migratsiya boshqarmasi (Göç idaresi)ga raddiya

Turkiyalik advokat Ibrohim Ergin X ijtimoiy tarmogʻida Turkiya Migratsiya boshqarmasi (Göç idaresi)ning ustoz Mubashshir Ahmadning Istanbulda qoʻlga olinishi va Oʻzbekiston hukumatiga topshirilishi yuzasidan jamoatchilik eъtirozlari boʻyicha bayonotiga raddiya berdi. Ushbu raddiyani toʻliq holda oʻzbek tiliga tarjima qilib, eъtiboringizga havola etamiz.

 

Migratsiya idorasi tomonidan eъlon qilingan bayonotda ustoz Alisher Tursunov jamoat tartibi va xavfsizligiga tahdid tugʻdirgani sababli uni deportatsiya qilishga qaror qilingani aytilgan. Biroq mazkur iddao ham Turkiya Respublikasining vakolatli organlari, ham xalqaro hamjamiyatning qonuniy va konkret asosiga tayanmagani aniq. Hurmatli ustoz na Turkiyada, na Oʻzbekistonda, na boshqa biror davlatda jamoat tartibini yoki xavfsizligini buzadigan biror harakatni amalga oshirmagan, yoxud uning jinoyat sodir etgani oʻz isbotini topmagan. Ochiq-oydin qayd etish zarurki, bu jarayon faqatgina Oʻzbekiston idoralari yuborgan informatsion xarakterdagi va qonuniy jihatdan oʻz aksiga ega boʻlmagan maъlumotlar taъsirida boshlangan. Shu nuqtai nazardan, deportatsiya qilish haqidagi tegishli qarorning 6458-sonli “Xorijliklar va xalqaro himoya toʻgʻrisida”gi qonunning 4 va 55-moddalarida qayd etilgan tamoyil va asoslar doirasida baholangani boʻyicha birorta ham ishora mavjud emas. Bu masala boʻyicha qilgan murojaatlarimizga berilgan salbiy javoblar qonuniy nazorat protsedurasi ishga solinmaganligini koʻrsatmoqda.

 

Ustoz Alisher Tursunov avval, 28.12.2023 sanasida Oʻzbekistondan kelgan va keyinchalik ish yurituvi toʻxtatilgan bir jinoiy ayblov tufayli uyidan olib ketilgan edi. Oʻsha kuni Istanbul viloyati migratsiya idorasi uni deportatsiya qilish va maъmuriy tartibda ushlash haqida qaror qabul qildi. 31.12.2023 sanasida deportatsiya toʻgʻrisidagi qarorga qarshi daъvo ochilib, idoraga taqdim etildi. Qariyb ikki oy davomida Deportatsiya markazida ushlab turilganidan keyin Istanbul 2-sonli jinoyat ishlari boʻyicha tinchlik sudining qaroriga koʻra qoʻyib yuborildi.

 

Qoʻyib yuborilgan kundan boshlab har dushanba kuni Kumkapi muvofiqlashtirish markaziga borib, imzo qoʻyish majburiyatini toʻliq bajarib keldi. Bu jarayonda deportatsiya haqidagi qarorga qarshi biz yuritgan daъvo natijasida Istanbul 15-sonli maъmuriy sudi ushbu qarorni BEKOR qildi. Migratsiya idorasi bayonotidan oʻrin olgan daъvoni rad etish toʻgʻrisidagi qaror boʻyicha birorta hujjat taqdim etilmadi yoki maъlumot berilmadi, biz bu qarorni ololmadik. Tegishli sud (15-sonli maъmuriy sud) qarori esa ilovada keltirilgan.  

 

Agar deportatsiya qilish toʻgʻrisida chindan ham kuchga kirgan qaror boʻlganida, hurmatli ustoz har hafta imzo qoʻyish majburiyatini bajarayotgan paytda ushlangan boʻlardi. Biroq bunday boʻlmagan. Buning oʻrniga 2025 yilning 8 may kuni uyida oʻtkazilgan operatsiyada qoʻlga olindi. Oilasiga va advokatlariga xabar bermasdan, hatto dorilarini olishiga va shaxsiy ehtiyojlarini qondirishiga ruxsat bermasdan nomaъlum tomonga olib ketildi. Oradan 8 kun oʻtgan boʻlsa-da, oilasi va advokatlari u bilan bogʻlana olmayapti. Bu holat qonunlarga va inson huquqlariga ziddir. Jamoatchilik orasida uning Oʻzbekistonda vafot etgani haqida iddaolar aylanib yuribdi va bu xavotir tobora kuchaymoqda.