Oʻzbekiston prezidenti Shavkat Mirziyoev 23 yanvarʻ kuni davlat tashrifi bilan Xitoyga bordi. Tashrif davomida muhim uchrashuv va muzokaralar boʻlib oʻtdi. Azon Global ushbu tashrifning eng muhim jihatlarini qisqacha tarzda eʻʻtiboringizga havola etadi.

23 dekabrʻ

Oʻzbekiston prezidenti Shavkat Mirziyoev Xitoy Xalq Respublikasi raisi Si Tszinʻpinning taklifiga binoan davlat tashrifi bilan ushbu mamlakatga joʻnab ketdi.

Davlat rahbarini “Shoudu” xalqaro aeroportida XXR madaniyat va turizm vaziri Sunʻ Eli va boshqa rasmiy shaxslar kutib oldi.

24 yanvarʻ

Shavkat Mirziyoev XXR Davlat kengashi bosh vaziri Li Tsyan bilan uchrashdi. Uchrashuvda Iinfratuzilmani modernizatsiya qilish, sanoat kooperatsiyasini, qishloq xoʻjaligida texnologiyalar transferini kengaytirish va “yashil” energetikani rivojlantirish boʻyicha alohida hamkorlik dasturlarini tayyorlash masalalari muhokama qilindi. Shuningdek, Xitoyning etakchi bank-moliya institutlari bilan amaliy hamkorlikni chuqurlashtirish hamda Xitoy kompaniyalarining Oʻzbekistondagi xususiylashtirish jarayonlarida ishtirok etishi istiqbollari koʻrib chiqildi.

Shavkat Mirziyoev Xalq siyosiy maslahat kengashi Butunxitoy qoʻmitasi raisi Chjao Letszi bilan ham uchrashuv oʻtkazdi. Unda Oʻzbekiston texnik yoʻnalishlar boʻyicha mutaxassislar tayyorlash markazlarini tashkil etish, Xitoyning ijtimoiy himoya va sugʻurta, aholiga manzilli yordam koʻrsatish borasidagi tajribasini oʻrganishdan manfaatdor ekani taʻʻkidlandi.

Davlat rahbari Pekindagi Tyanʻanʻmenʻ maydoniga tashrif buyurib, Xalq qahramonlari yodgorligi poyiga gulchambar qoʻydi, XIX-XX asarlarda Xitoy mustaqilligi va ozodligi yoʻlida qurbon boʻlganlarning xotirasiga hurmat bajo keltirdi.

Oʻzbekiston prezidenti Osiyo infratuzilmaviy investitsiyalar banki bosh qarorgohiga tashrif buyurib, bank prezidenti Tszinʻ Litsyunʻ bilan muzokara oʻtkazdi. Davlat rahbari strategik xomashyoni chuqur qayta ishlash loyihalarini moliyalashtirishni kengaytirish hamda davlat-xususiy sheriklik asosida ijtimoiy ahamiyatga ega dasturlarni amalga oshirish muhimligini qayd etdi.

Xitoyning CNPC neftʻ-gaz korporatsiyasi raisi Day Xoulyan bilan uchrashuvda Oʻzbekistonda erosti gaz saqlash sigʻimlarini barpo etish va gaz etkazish tizimlarini modernizatsiya qilish, zamonaviy burgʻilash texnologiyalarini joriy qilish va neftʻ-gaz tarmogʻi uchun mutaxassislar tayyorlash boʻyicha istiqbolli loyihalarni amalga oshirish masalalari muhokama qilindi.

Xitoy Eksport-import banki raisi Vu Fulin bilan uchrashuvda esa Bankning Toshkent shahrida mintaqaviy ofis ochish hamda transport va ijtimoiy infratuzilma, sanoat va xususiy sektorni rivojlantirish boʻyicha yangi istiqbolli loyihalarni shakllantirish borasidagi rejalari koʻrib chiqildi.

Pekin shahri Tyanʻanʻmenʻ maydonidagi Xalq yigʻinlari uyida Oʻzbekiston prezidentti Shavkat Mirziyoevni rasmiy kutib olish marosimi boʻlib oʻtdi. Davlat rahbari sharafiga faxriy qorovul saf tortdi. XXR raisi Si Tszinʻpin Oʻzbekiston prezidenti Shavkat Mirziyoevni kutib oldi.

Kutib olish marosimidan soʻng 24 yanvarʻ kuni Shavkat Mirziyoev va Si Tszinʻpinning rasmiy delegatsiyalar aʻʻzolari ishtirokidagi muzokaralari boʻlib oʻtdi. Uchrashuvda:

·         “Bir makon, bir yoʻl” tashabbusi doirasida Transmintaqaviy transport va tranzit koʻprigining muhim tarkibiy qismi boʻladigan “Xitoy – Qirgʻiziston - Oʻzbekiston” temir yoʻlini qurish boʻyicha amaliy ishlarni tez fursatda boshlash muhim ekani taʻʻkidlandi;

·         taʻʻlim va turizm sohasidagi hamkorlikni faollashtirish, oʻzaro madaniyat kunlarini oʻtkazish amaliyotini davom ettirish zarurligi koʻrsatib oʻtildi;

·         “Yagona Xitoy” siyosati hamda “uch yovuz kuch”ga qarshi kurashish borasidagi pozitsiya oʻzgarmas ekani tasdiqlandi;

·         Shavkat Mirziyoev Si Tszinʻpinni tashrif bilan Oʻzbekistonga kelishga taklif qildi.

Oliy darajadagi muzokaralardan soʻng ikki tomonlama hujjatlarni imzolash marosimi boʻlib oʻtdi. Jumladan, Oʻzbekiston prezidenti Shavkat Mirziyoev va Xitoy raisi Si Tszinʻpin “oʻzaro manfaatli hamkorlikni turli sohalarda har tomonlama mustahkamlash” va boshqalar koʻzda tutilgan Qoʻshma bayonotni imzoladi.

Etakchilar huzurida imzolangan hujjatlar:

– Oʻzbekiston va Xitoy hukumatlari oʻrtasida atrof-muhitni muhofaza qilish sohasidagi hamkorlik toʻgʻrisida bitim;

– Oʻzbekiston va Xitoy hukumatlari oʻrtasida texnik-iqtisodiy hamkorlik toʻgʻrisida bitim;

– Oʻzbekiston va Xitoy hukumatlari oʻrtasida inson resurslarini rivojlantirish boʻyicha hamkorlik toʻgʻrisida bitim;

– Oʻzbekiston va Xitoy hukumatlari oʻrtasida davlat ilmiy-tadqiqot muassasalari hamkorligi toʻgʻrisida bitim;

– Oʻzbekiston Oliy taʻʻlim, fan va innovatsiyalar vazirligi va Xitoy Taʻʻlim vazirligi oʻrtasida xitoy tilini oʻqitish sohasidagi hamkorlik toʻgʻrisida bitim;

– Oʻzbekiston Qishloq xoʻjaligi vazirligi va Xitoy Bojxona bosh boshqarmasi oʻrtasida Oʻzbekistondan Xitoyga noʻxat eksport qilishda fitosanitar talablar va nazorat toʻgʻrisida bayonnoma;

– Oʻzbekiston Transport vazirligi va Xitoy Islohotlar va rivojlanish davlat qoʻmitasi oʻrtasida Xitoy – Markaziy Osiyo – Evropa temir yoʻl ekspresslari boʻyicha hamkorlikni chuqurlashtirish toʻgʻrisida bayonnoma;

– Oʻzbekiston Iqtisodiyot va moliya vazirligi va Xitoy Tijorat vazirligi oʻrtasida yangi elektr transport vositalari sohasidagi hamkorlikni rivojlantirish toʻgʻrisida bayonnoma;

– Oʻzbekiston Kambagʻallikni qisqartirish va bandlik vazirligi va Xitoy Qishloq xoʻjaligi va qishloq masalalari vazirligi oʻrtasida kambagʻallikni qisqartirish sohasidagi hamkorlik toʻgʻrisida ahdlashuv bayonnomasi;

– Oʻzbekiston Oliy taʻʻlim, fan va innovatsiyalar vazirligi va Xitoy Fan va texnologiyalar vazirligi oʻrtasida ilmiy-texnik hamkorlikni yanada mustahkamlash toʻgʻrisida hamkorlik bayonnomasi;

– Oʻzbekiston Texnik tartibga solish agentligi va Xitoy Standartlashtirish maʻʻmuriyati oʻrtasida standartlashtirish sohasidagi hamkorlik toʻgʻrisida bayonnoma;

– Oʻzbekiston Transport vazirligi va Xitoy fuqarolik aviatsiyasi boshqarmasi oʻrtasida “Havo ipak yoʻli”ni birgalikda barpo etish toʻgʻrisida kelishuv;

– Oʻzbekiston Ekologiya, atrof-muhitni muhofaza qilish va iqlim oʻzgarishi vazirligi huzuridagi Turizm qoʻmitasi va Xitoy Madaniyat va turizm vazirligi oʻrtasida 2024-2026 yillarda turizm sohasidagi hamkorlik rejasi;

– Toshkent viloyati va Shenʻsi muzofoti oʻrtasida sheriklik aloqalarini oʻrnatish toʻgʻrisida bitim;

– Samarqand va Tsindao shaharlari oʻrtasida sheriklik munosabatlarini oʻrnatish toʻgʻrisida bitim va boshqalar.

Oʻzbekiston-Xitoy munosabatlari boʻyicha muhim maʻʻlumotlar

2023 yilda ikki davlat oʻrtasidagi tovar ayirboshlash 50 foizga oshib, rekord koʻrsatkich – 14 milliard dollarga etdi.

Bu koʻrsatkichni shu jumladan yuqori sifatli sanoat va qishloq xoʻjaligi mahsulotlarini oʻzaro etkazib berishni koʻpaytirish hisobiga 20 milliard dollarga etkazish rejalashtirilmoqda.

Keyingi yillarda Xitoydan Oʻzbekiston iqtisodiyotiga investitsiyalar hajmi besh barobar, qoʻshma korxonalar soni esa uch barobar oshdi.

Xitoydan Oʻzbekiston iqtisodiyotiga kiritilgan investitsiyalarning umumiy hajmi 14 milliard dollardan oshdi.

Oʻzbekistonda Xitoyning “Lu Banʻ ustaxonasi” professional taʻʻlim tizimini joriy qilish boʻyicha pilot loyiha boshlandi.