Xitoy rahbari: Pekin har qanday sharoitda ham Eron bilan hamkorlikni rivojlantirishga tayyor

 

Xitoy xalqaro va mintaqaviy vaziyat oʻzgarishidan qatʻʻi nazar, Eron bilan doʻstona hamkorlikni izchil rivojlantiradi. Bu haqda XXR raisi Si Tszinʻpin Qozonda boʻlib oʻtayotgan BRIKS 16-sammiti doirasida Eron prezidenti Masud Pezeshkian bilan uchrashuvda aytib oʻtdi, deya xabar beradi Xitoy TIV matbuot xizmati.

Eron muhim mintaqaviy va xalqaro nufuzga ega davlat, Xitoyning yaxshi doʻsti va hamkori, dedi Xitoy rahbari.

Uning soʻzlariga koʻra, Xitoy-Eron munosabatlarining strategik ahamiyati misli koʻrilmagan oʻzgarishlar jadallashgani sari yaqqol namoyon boʻlmoqda.

Pekin milliy suverenitet, xavfsizlik va milliy qadr-qimmatni himoya qilishda, oʻzining ijtimoiy-iqtisodiy rivojlanishini izchil ragʻbatlantirishda, qoʻshni davlatlar bilan yaxshi qoʻshnichilik va doʻstona munosabatlarni yaxshilash va chuqurlashtirishda Eronni qoʻllab-quvvatlaydi, dedi Si Tszinʻpin.

Uning taʻʻkidlashicha, Xitoy Eron bilan bir-birini qatʻʻiy qoʻllab-quvvatlash, xalqaro munosabatlarning asosiy meʻʻyorlari, jumladan, ichki ishlarga aralashmaslik, ikki davlatning qonuniy huquq va manfaatlarini himoya qilish uchun hamkorlik qilishga tayyor.

Xitoy BRIKS va boshqa koʻp tomonlama tuzilmalar doirasida Eron bilan hamkorlikni mustahkamlash, Global Janubning taʻʻsiri va ovozini yanada kuchaytirishga, yanada adolatli va oqilona xalqaro tartibni shakllantirishga hissa qoʻshishga tayyor, deya qoʻshimcha qildi Xitoy rahbari.

Uchrashuvda mintaqaviy masalalar yuzasidan ham fikr almashildi. Si Tszinʻpin, xususan, Yaqin Sharqdagi mavjud vaziyatdan chuqur xavotir bildirdi.

Uning taʻʻkidlashicha, ertaroq oʻt ochishni toʻxtatish va Gʻazo sektoridagi urushni tugatish mintaqaviy taranglikni bartaraf etishning kalitidir.

Eron prezidenti Pezeshkian, oʻz navbatida, Xitoy Eronning eng muhim hamkorlik sherigi ekani, Eron-Xitoy keng qamrovli strategik sheriklik aloqalari va turli sohalardagi ikki tomonlama hamkorlik barqaror rivojlanish dinamikasini saqlab qolayotganini aytdi.

Eron Xitoy bilan keng qamrovli hamkorlik rejasini amalga oshirish va yangi natijalarga erishish uchun aloqa, infratuzilma va toza energiya sohalarida ikki tomonlama hamkorlikni chuqurlashtirish uchun Xitoy bilan birgalikda saʻʻy-harakatlarni amalga oshirishga intiladi, bu nafaqat Eronning milliy rivojlanishiga, balki mintaqada tinchlik va barqarorlikni mustahkamlashga yordam beradi, - dedi u.